ዬ ማጻፋ 111 - Geeshsha Maxaafa

¹ GODAA galatite! Suureta shiiqoninne dere duulatan tani kumeththa wozinappe GODAA galatana.

² GODAA oosoti ay keena gitaa! Isttan ufayettizayti ubbay istti yuushshi qoppanaas bessees.

³ Iza oosoti bonchchoninne teeman kumidayta; iza xilloteththika mernaas dees.

⁴ Izi ba malalisiza oosota hassa7ettana mala ooththides. Izi kiyanne maariza GODAA.

⁵ Baas yayyizaytas kath immees; ba caaqo qaalaakka mernaas qoppees.

⁶ Allagata biitta ba deraas immidi ba mino oosoza ba kawoteththaa bessides.

⁷ Iza oosoti tumanne suure; iza wogatikka ubbay ammanettizayta.

⁸ Istti mernaas eqqi de7izayta; tumateththaninne suureteththan imettida.

⁹ Izi ba asaas atoteth immides; ba caaqo qaalakka isttas mernaas azazides; iza sunththi geeshshinne yashissizaaza.

¹⁰ Aadho erateththas koyroy GODAAS yashshateththa; iza azazo ooththizaytas lo7o akeekay dees. GODAY mernaas galatetto!