ዬ ማጻፋ 107 - Geeshsha Maxaafa

Ichchashanththo Maxaafa ( Maza 107—150 )

¹ Izi kiyanne iza siiqoy mernaas gidida gishshas GODAA galatite.

² GODAY istta wozzidayti, istta morkketa kusheppe izi ashshidayti hizgetto;

³ arshey mokkizasoppenne wullizasoppe, pudehappenne dugehappe dere ubbaafe izi shiishshidayti hizgi haasayetto.

⁴ Isttafe issoti issoti bazzo biittan toylattida; ba de7iza katama efiza oge demmanaas dandaybeettenna.

⁵ Istti gafidanne saamettida; keehippe daaburda.

⁶ Istti metotida wode GODAAKKO waassida; izikka istta waayezappe ashshides.

⁷ Istti de7ana katama gakkanaas, izi istta sitta ogera kaaleththides.

⁸ Mernaa iza siiqozassinne izi asas ooththida malalisiza miishshatas istti GODAA galatetto!

⁹ Ays giikko izi saamettidayta ushshi alisees; gafidaytakka lo7o miishshan kalssees.

¹⁰ Isttafe issoti issoti birata sansalatan qashettidi waayettizayta; sakkanna dhuma giddonkka uttidayta;

¹¹ Gaasoykka istti Xoossa qaala bolla makkallidanne Ubbaafe Dhoqqa Xoossa zore kadhida.

¹² Hessa gishshas wolqqa ooson istta ixeththides; istti daaburiin istta maaddizay dhaydes.

¹³ Istti metotida wode GODAAKKO waassida; izikka istta waayezappe ashshides.

¹⁴ Sakkanna dhumappe istta kessides; istti qashettida sansalatakka duusereththides.

¹⁵ Mernaa iza siiqozassinne izi asas ooththida malalisiza miishshatas istti GODAA galatetto.

¹⁶ Ays giikko izi xarqimalappe oosettida penge menththides; birata kolatatakka qanxxereththides.

¹⁷ Isttafe issoti issoti ba makkallateththa gaason eeya gidida; ba nagara gaasonkka meton gelida.

¹⁸ Istta qoodhey kath ixxiin hayqqana matida.

¹⁹ Istti metotida wode GODAAKKO waassida; izikka istta waayezappe ashshides.

²⁰ Izi ba qaala kiittidi istta paththides; duufo doonappeka istta ashshides.

²¹ Mernaa iza siiqozassinne izi asaas ooththida malalisiza miishshatas istti GODAA galatetto.

²² Istti izas galata yarsho yarshetto; qasseka ufayssa yeththan izi ooththida ooso qonccisetto.

²³ Isttafe issoti issoti markaben gita abba giddora bida; he gita abba bolla bantta ooso ooththida.

²⁴ Istti GODAA ooso be7ida; izi ciimma garsan ooththida malalisiza oosota xeellida.

²⁵ Izi azaziin gote carkoy dendides; histtiin abba dambalay qaaxxides.

²⁶ Istti pude salo kezida; simmidikka duge ciimman gelida; istta gakkida metoppe dendoyssan istta wozinay taahides.

²⁷ Istti maththottida asa mala yiicotidi gandigarda; isttas akeekiza wozinaykka dammides.

²⁸ Istti metotida wode GODAAKKO waassida; izikka istta waayezappe ashshides.

²⁹ Izi gote carkoza co7u histtides; abba dambalakka sirphi histtides.

³⁰ Co7u gida gishshas istti ufayettida; istti amottiza wodeben gaththides.

³¹ Mernaa iza siiqozassinne izi asas ooththida malalisiza miishshatas istti GODAA galatetto.

³² Istti iza dere duulatan dhoqqu dhoqqu histtetto; qasse cimata shiiqon iza galatetto.

³³ Shaafata mulera melissides; pulttoti pulttontta mala teqqides.

³⁴ Heen de7iza asaa iitateththaa gaason aradda biittayo aykko dolisontta maxine biitta ooththides.

³⁵ Izi bazzon haath eelissides mela biittan pulttoy dhuuqqana mala ooththides.

³⁶ Gafidayta heen woththides; isttika banttas de7ana katama keexxida.

³⁷ Istti bantta goshshan zerida; woyne tokkida; daro kath shiishshida.

³⁸ Izi istta anjjiin istti keehi corattida; istta mehetakka guuththibeenna.

³⁹ Meton, waayeninne ceecen xoonettiin istta qooday guuxxides.

⁴⁰ GODAY halaqata kawushshides; ogey baynda bazzon toylattana mala istta ooththees.

⁴¹ Gido attiin izi metotanchchata istta waayeppe kessides; dorsa wude mala cora naytakka isttas immides.

⁴² Suure asati hessa be7idi ufayetteettes; gido attiin geellata doonay gordettana.

⁴³ Era asi ha yo7oza ba wozinan woththo; izikka GODAA maaroteth akeeko.