ዬ ማጻፋ 106 - Geeshsha Maxaafa

¹ GODAA galatite! Izi kiya gidida gishshas, iza siiqoykka mernaas gidida gishshas GODAA galatite.

² GODAY ooththida wolqqama ooso yootanaas, woykko iza galata ubbaa qonccisanaas dandayzay oonee?

³ Pirday geellattontta mala naagizaytinne ubba wode xillo ooththizayti anjjettidayta.

⁴ Abeet GODAWU! Neni ne asaa maaddiza wode tana qoppa; istta neni ashshiza wode tanakka alla.

⁵ Hessika ne doorida asaas sa7ay kiyiin tani beyana mala, ne asaa ufayssa tani ufayettana mala, ne nayti bonchchettida gaason tanikka ufayssan magulana malassa.

⁶ Nuni nu aawata mala nagara ooththidos; mooronne iita ooththidos.

⁷ Nu aawati Gibxen de7iza wode, ne malalisiza ooso qoppibeettenna. Ne siiqo daroteththaa istti akeekibeettenna; Zo7o abba lanqen makkallida.

⁸ Gidikkoka izi ba sunththaa gishshas, ba gita wolqqa erisanaas istta ashshides.

⁹ Izi Zo7o abba seerides; abbayka melides; bazzon kaaleththizayssa mala ciimma giddora istta kaaleththidi pinththides.

¹⁰ Izi istta ixxizayta kusheppe ashshides; morkketa kusheppe istta wozzides.

¹¹ Istta morkketa haaththi mittides; isttafe issoyka attibeenna.

¹² He wode Isra7eeleti iza qaala ammanida; iza yeththan sabbida.

¹³ Gidikkoka istti izi ooththoyssa heerakka dogida. Iza zore naagontta bantti koyidayssa ooththida.

¹⁴ Istti bazzo biittan keehi amottida; qasse mela biittankka Xoossa paaccida.

¹⁵ Hessa gishshas izi istti woossidayssa immides; gido attiin istta shemppos gilqateth kiittides.

¹⁶ Asati bazzon dunkaani dishe Musenne GODAAS dummatida aylle Aaroone qanaatida wode,

¹⁷ biittay doyettidi Daataane mittides; Abraame iza keeththa asatara moogides.

¹⁸ Qasse istta maabaraa giddon tamay eexxiin, lacoy he iita asata xuuggides.

¹⁹ Korebe Zuman de7ishe worqqa seerisidi mara misle medhdhida; histtidi he mislaas goynnida.

²⁰ Istti bantta bonchcho Xoossaa maata miza miiza mislen laammida.

²¹ Istti banttana ashshida Xoossa dogida; izi Gibxen gita ooso,

²² Kaame biittankka malalisizayssanne Zo7o abban, «Hoola!» giissizayssa ooththidayssa dogida.

²³ Hessa gishshas Xoossi istta dhayssana gides; gido attiin dhayssontta mala iza hanqoza zaaranaas Xoossi doorida Musey giddon eqqides.

²⁴ He lo7o biittayo kadhida; Hessafe guye iza qaalan ammanettibeettenna.

²⁵ Istti bantta Dunkaaneza giddon zuuzumidanne GODAA qaalas azazettontta ixxida.

²⁶ Hessa gishshas istti bazzon kundi dhayana mala, izi ba kushe denththidi caaqqides.

²⁷ Istta zereththati kawoteththata giddon olettanayssanne istti biitta gaxa gakkanaas laalettanayssa yootides.

²⁸ Hessafe guye istti Ba7aali-Pe7ooren diza eeqas goynnizaytara issife gayttida; shemppoy baynda eeqatas yarshettida yarshoza mida.

²⁹ Istti bantta ooson GODAA hanqeththida; histtiin istta giddon iita hargey wodhdhides.

³⁰ Gido attiin Finihaasi dendidi istta mooroza pirdiin iita hargey istta bollafe kichchides.

³¹ Hessika yeletappe yeleta gakkanaas mernaas izas xilloteth gididi qoodettides.

³² Mariiba pultto matan GODAA hanqeththida; istta gaason Muse bolla metoy gakkides.

³³ Ays giikko istti Muse yiillosida; histtiin iza doonappe bessontta qaalay ke7ides.

³⁴ GODAY dhayssite giin istti Kanaane asata dhayssibeettenna.

³⁵ He palaappe istti he kawoteththatara geletti ekettidi walakettidanne istta de7o woga kaallida.

³⁶ Xoossa asati istta eeqas goynnida; hessika isttas woximade gidides.

³⁷ Istti bantta attumanne macca nayta daydanththatas yarshida.

³⁸ Istti xillo suuth Kanaane eeqatas yarshida; bantta attumanne macca nayta suuth gussida; he suuththan biittay tunides.

³⁹ Hessaththo istti bantta ooson tunidanne layma maccassa mala bantta Xoossas ammanettontta ixxida.

⁴⁰ Hessa gishshas GODAA hanqoy iza asaa bolla eexxi ke7ides; izi bayta harassettides.

⁴¹ Izi istta hara kawoteththata kushen aaththi immides; istta morkketi istta haarida.

⁴² Istta morkketi istta naaqqidanne bantta shenen ayssida.

⁴³ Izi istta daroto ashshides; gido attiin istta makkallas gixxi kezida; bantta nagara gaason dhayda.

⁴⁴ Gidikkoka istti waassida waasoza siyidi istta waayeza qoppides.

⁴⁵ Istta gishshas ba caaqo qaala hassa7ides; aggontta ba siiqo daron istta maarides.

⁴⁶ Istta di7ida ubbay isttas qadhettana mala ooththides.

⁴⁷ Abeet GODAWU Nu Xoossawu! Nuna ashsha. Nuni ne geeshsha sunththa galatana mala kawoteththata giddofe nuna shiishsha.

⁴⁸ GODAY, Isra7eele Xoossi mernaappe mernaa gakkanaas galatetto! Asay ubbay, «Amiin» go. GODAA galatite!