ዬ ማጻፋ 105 - Geeshsha Maxaafa

¹ GODAA galatite; iza sunththa xeygite; izi ooththida oosota kawoteththata erisite.

² Izas ginxo giigsite; galata yeththika yexxite; malalisiza iza ooso ubbaa yootite.

³ Geeshsha sunththan izayssan ceeqettite; GODAA koyzayta wozinay ufayetto.

⁴ GODAANNE iza wolqqa xomosite; ubbato iza sinththa koyite.

^5-6 Intteno iza aylle Abrahaame zereththatoo! Doorettida Yaaqoobe naytoo! Izi ooththida malalisiza oosota, iza malaatanne izi pirdida pirda akeekite.

⁷ Izi GODAA nu Xoossaa; iza suure pirdayka sa7a ubbaa bolla dees.

⁸ Izi ba caaqo qaala mernaas ba azazida qaala shii yeleta gakkanaas naagees.

⁹ Izi Abrahaames caaqqida caaqo qaala, Yisaaqas immida qaala balenna.

¹⁰ Hessa Yaaqoobes woga, Isra7eelesikka mernaa caaqo qaala histtidi minththi essides.

¹¹ Qasseka, «Nees Kanaane biittaa immana; izikka ne zereththatas laata gidana» gides.

¹² Istti qoodan qii guuththatanne Kanaane biittan bete gididi diza wode,

¹³ issi dereppe hara dere, issi kawoteththafe hara kawoteth yuuyida.

¹⁴ Xoossi istta oonikka qohanaas immibeenna; istta gishshas kawota seerishe,

¹⁵ «Tani tiydayta bochchofte; nabeta qohopite» gides.

¹⁶ GODAY biittaa bolla kosha yeddides. Istta kath ubbaa dhayssides.

¹⁷ Gido attiin izi ba asaa ashshanaas isttafe sinththan aylleteththas bayzettida Yooseefe kiittides.

¹⁸ Iza tohoti kaatenan waaxettida; izi sansalatan qashettides.

¹⁹ Izi kase yootidayssi polettana gakkanaas GODAA qaalay iza paaccides.

²⁰ Kawoy as kiittidi iza birshisides; deraa haarizayssi qasho keeththafe kessides.

²¹ Kawozi iza ba keeththas goda ooththides; baas diza ubbaa aqota bolla shuumides.

²² Hessika shuumeta maarara kaaleththana malanne gita asata aadho erateth tamaarsana mala sunththides.

²³ Hessafe guye Isra7eeley Gibxe gelides; Yaaqoobey Kaame biittan bete as gididi de7ides.

²⁴ GODAY ba asaa keehi corasides; istta morkketappe istta aaththi minththides.

²⁵ Izi Gibxe asay ba asaa ixxana malanne ba aylleta bolla dendana mala ooththides.

²⁶ Hessafe guye ba aylle Musenne ba doorida Aaroone isttako kiittides.

²⁷ Istti Gibxe asata sinththan Xoossa malaata, Kaame biittan malalisiza miish ooththida.

²⁸ GODAY dhuma kiittidi he biitta dhumisides; gido attiin Gibxe asati iza azazo ixxis gida.

²⁹ Istta haaththa suuththan laammidi moleta wodhides.

³⁰ Istta biitta ubbaa kawoza keeththaaka shodhdhey kumides.

³¹ Izi azaziin boxeynne uu7ey istta biitta ubbaa bolla shom7ushom7ides.

³² Istta biitta bollan ira gishshas shach wolqqanththara bukisides.

³³ Izi istta woyne turanne balase mith ubbaa dippi histtides; istta biittan de7iza miththatakka menththereththides.

³⁴ Izi azaziin booleynne qooday baynda gumbaroy kezides.

³⁵ Histtidi istta gaden mokkida kath ubbaa mides; istta biittan diza cilila miish ubbaaka dippi histtides.

³⁶ GODAY Gibxe deren bayrata ubbaa wodhides; koyro yelettida nayta ubbaaka dhayssides.

³⁷ Hessafe guye izi Isra7eele asaa worqqanne bira alleqora kessides; istta giddofe kundidi attiday ooninne baawa.

³⁸ Gibxe asati isttas daro yayyida gishshas istti kezi bishin ufayettida.

³⁹ Xoossay istta kammanaas shaara miccides; omars isttas poo7isanawu tama giigsides.

⁴⁰ Istti miza miish oychchiin kuracho misatiza kafota isttas yeddides; istta salo quma kalisides.

⁴¹ Izi zaalla phalqiin haaththi pulttides; shaafa malakka duge bazzo goggides.

⁴² Izi ba aylle Abrahaames caaqqida geeshsha qaala hassa7ides.

⁴³ Izi ba asaa ufayssan, ba dooridayta ililisan kessides.

⁴⁴ Izi isttas hara kawoteththata biitta immides; histtiin istti harati daaburi kessida kaththa ayfe laattida.

⁴⁵ Hessa izi ooththiday istti izi woththida maara naaganaassa; iza wogaakka polanaassa. GODAA galatite!