ዬ ማጻፋ 104 - Geeshsha Maxaafa

¹ Ta shemppoyee! GODAA ta Xoossa galata! Abeet GODAA ta Xoossawu! Neni ay keena gitaa! Neni bonchchonne teema may7adasa.

² Neni afala mala poo7o quma7adasa; salotakka dunkaane mala toladasa.

³ Ne keeththaa salo gufanththo bollan keexxadasa; shaara nees para-gaare kessadasa; carko qefe toggada baasa.

⁴ Neni carkota ne kiitanchcha, tama lacokka ne aylle kessaasa.

⁵ Neni sa7a yochcha bolla essadasa; izi meri mernaaskka qaaxxenna.

⁶ Wogga gita abba biitta bollan afala mala miccadasa; haaththika gita zumata kammides.

⁷ Gido attiin ne seeriin haaththati kichchida; ne azazo siyidi eeson baqatida.

⁸ Istti gita zumatappe duge shoobbata wodhdhida; neni isttas giigsidaso goggida.

⁹ Haaththati simmidi biitta kammontta mala, istti aadhdhontta mala zawa essadasa.

¹⁰ Neni pulttota shoobban pulttisaasa; haath zumata giddora duge gogissaasa.

¹¹ Bazzo do7ati ubbay izappe uyeettes; harididatikka saamos izappe uyi aleettes.

¹² Salo kafoti haaththaa matan bantta keeththa keexxeettes; miththa haggata giddonkka yexxeettes.

¹³ Neni gita zumata bollan saloppe ira bukisaasa; biittaaka ne kushe ooso ayfen kunththadasa.

¹⁴ Neni mehes maata, asas kath mokisaasa; hessan asay biitta ooththidi kath shiishshees.

¹⁵ Asa wozina ufayssiza woyne, sinth shicissiza zaytenne wolqqa immiza kath demmees.

¹⁶ GODAA miththati, izi tokkida Libaanoose zigati daro ira uyi kalleettes.

¹⁷ Isttan kafoti bantta keeth keexxeettes; zigiletikka ziga bolla keexxidi de7eettes.

¹⁸ Dhoqqa zumata bollan Wushati de7eettes; qasse guppaleti shuchcha gongolon qotetteettes.

¹⁹ Wodaa qooda erisanaas neni agina medhdhadasa; arshey ba wulliza wode erees.

²⁰ Neni dhuma ehiza wode sa7ay qammees; wora do7atikka kezidi woxeretteettes.

²¹ Wodalla gaammoti maana miishshas waasseettes; istti banttas miza miish Xoossafe koyeettes.

²² Arshey mokkiza wode guye simmidi bantta aqoson ichcheettes.

²³ He wode asi ba oosos kezees; sa7ay qammana gakkanaas ooththees.

²⁴ Abeet GODAWU! Ne oosoy ay keena daroo! Ne aadho erateththan neni istta ubbaa medhdhadasa; ne medhdhida medhetati biitta kumida.

²⁵ Hanna abbaya gitanne aaho; qooday baynda qaaxxiza medheteththati, guuththatinne gitati izin kumida.

²⁶ Izi bollan markabeti simeretteettes; qasse neni medhdhida Lewataane geetettiza miiminttey izin kaa7ees.

²⁷ Koshshiza wode ne isttas mizaaz immana mala istti ubbay neekko xeelleettes.

²⁸ Neni isttas immida wode istti shiishsheettes; neni ne kusheppe yeggiin istti lo7o miish kalleettes.

²⁹ Neni ne sinththa genththiza wode dagammeettes; ne istta shemppo ekkiza wode hayqqeettes; duge biittankka simmi geleettes.

³⁰ Gido attiin neni isttas ne ayana kiittida wode harati medhetteettes; biittaaka ooraxissaasa.

³¹ GODAA bonchchoy mernaas de7o; GODAY ba ooson ufayetto.

³² Izi biitta xeelliin biittay qaaxxees; qasse izi zumata bochchiin zumati cuwatteettes.

³³ Tani de7iza layth ubbaan GODAAS yexxana; tani shemppora paxa de7ida wode ubbaan ta Xoossas yexxana.

³⁴ Tani GODAAN ufayettiza gishshas ta wozina qofay iza ufaysso.

³⁵ Nagaranchchati biittafe dhayetto; hayssafe sinththas iitati dooppetto. Ta shemppoyee! GODAA galata! GODAA galata!