ዬ ማጻፋ 103 - Geeshsha Maxaafa

Dawite Mazamure

¹ Ta shemppoyee! GODAA galata! Ta kumeththa asateththay iza geeshsha sunththa galato.

² Ta shemppoyee! GODAA galata! Izi nees ooththida kiyateththa ubbaa dogoppa.

³ Izi ne nagara ubbaa atto gees; izi ne harge ubbaafe nena paththees.

⁴ Izi nena duufon gelontta mala ashshees; mernaa siiqoninne maarotan nena anjjees.

⁵ Golle kafoththo neni ooraxana mala izi ne amo ubbaa lo7o miishshan kunththana.

⁶ GODAY naaqettidaytas xillo ooththeessinne suure pirda pirdees.

⁷ Izi ba oge Muse bessides; ba oosokka Isra7eele asaa erisides.

⁸ GODAY qadhettizaadenne maarizaade; izi hanqettanaas eesotonttaade; iza siiqoy keehippe daro.

⁹ Izi ubba wode nu mooros mootenna; mernaaskka hanqettenna.

¹⁰ Izi nu nagara mala nuus ooththibeenna; nu iitateththaa mala nuus zaaribeenna.

¹¹ Saloy sa7appe dhoqqiza mala GODAAS yayyizaytas iza siiqoy gita.

¹² Arshey mokkizasoppe wullizasoy haakkiza mala GODAY nu mooroza nuuppe haassides.

¹³ Aaway ba naytas qadhettiza mala GODAY baas yayyizaytas qadhettees.

¹⁴ Nuni aazappe medhettidaakko izi erees; nuni biitta gididayssaka izi akeekees.

¹⁵ Asa de7oy gidikko maata mala; izi bazzo ciishsha mala ciiyees.

¹⁶ Carkoy carkiza wode qoqofetti dhayees; izi kase dizasoy mulekka erettenna.

¹⁷ Gido attiin GODAAS yayyizaytas iza siiqoy mernaappe mernaa gakkanaassa; iza xilloteththayka yeletappe yeleta gakkanaassa.

¹⁸ Hessi hananay iza caaqo qaala naagizaytassinne iza azazo polanaas minettizaytassa.

¹⁹ GODAY ba araataa salon essides; iza kawoteththay ubbaa haarees.

²⁰ Intteno iza kiitanchchatoo! Iza azazo poliza wolqqamatoo! Izi gizayssa ezgizaytoo! GODAA galatite.

²¹ Intteno salon de7iza minotoo! Iza shene ooththiza aylletoo! GODAA galatite.

²² Intteno izi haariza soho ubbaan de7iza medhetatoo! ubbayka GODAA galatite. Ta shemppoyee! GODAA galata.