ዬ ማጻፋ 102 - Geeshsha Maxaafa

Ceecida Wodenne Metotida Wode Xoossa Sinththan Woossida Woosa

¹ Abeet GODAWU! Ta woosa siya; ta waasoy neekko gakko.

² Ta metotida gallas ne sinththa taappe genththofa; ne hayththa taakko zaara; tani neekko waassiza wode taas eeson alla.

³ Ays giikko ta layththay cuwa mala dhayees; ta meqeththaykka tama bonqo mala eexxees.

⁴ Ta wozinay away labida maata mala handes; taas qoodhey kath ixxides.

⁵ Taas oole daroppe dendoyssan meqeththi xalla attides.

⁶ Tani bazzon diza biya kafo woykko laalettida keeththan de7iza gutto mala.

⁷ Tani ichchiin dhiskoy yeenna; tani keeththa hu7en barkka uttida kafo mala gidadis.

⁸ Ta morkketi ubbaa gallas tana cayeettes; tana iiseththizayti ta sunth qanggettida mala qoodida.

⁹ Tani bidinth dhiille mala qam7adis; ta afunththaaka ushshara walakka uyadis.

¹⁰ Ne hanqo gaasoninne ne bosha gaason ne tana pude denththoosoppe duge oladasa.

¹¹ Ta de7o layththay omarsa wode kuwa mala; tani maata mala meladis.

¹² Gido attiin abeet GODAWU! Neni kawoteththa araatan mernaas uttadasa; ne sunththayka yeletappe yeleta gakkanaas hassa7ettana.

¹³ Neni Xiyoonis kiyateth ooththiza wodey gakkida gishshassinne wodezikka ha7i gidida gishshas neni dendada izis qadhettana.

¹⁴ Ne oosanchchati izan diza shuchchata doseettes; budhettida biittaska qadhetteettes.

¹⁵ Kawoteththati GODAA sunththaas yayyana; sa7a kawoti ubbay iza bonchchana.

¹⁶ GODAY Xiyoono zaari essiza wode izi ba gitateththa bessana.

¹⁷ Izi hiyeesata woosaa siyana; istta shoobbeka kadhenna.

¹⁸ Buron yelettanay GODAA galatana mala hayssi yiza yeletas xaafetto.

¹⁹ GODAY dhoqqan diza ba geeshsha sohoppe duge xeellides; izi saloppe duge sa7a be7ides.

²⁰ Hessika qashettida asata waaso siyanaassinne hayqos pirdettida asata qashoppe birshanaassa.

²¹ Hessa gishshas GODAA sunththi Xiyoonin yootettana; iza galatay Yerusalaamen awajjettana.

²² Deretinne kawoti issife shiiqidi GODAAS he wode goynnana.

²³ Izi tani naateteththan dishin, izi ta minoteththaa ogen ashshides; ta daana layththaaka qaanththides.

²⁴ Histtiin tani, «Abeet ta Xoossawu! tani daana layththaa buro baggasishin ne tana ekkofa. Abeet GODAWU! Neni yeletappe yeleta gakkanaas daasa» gays.

²⁵ Neni beni sa7a medhdhadasa; salotikka ne kushe ooso.

²⁶ Heyti ubbay dhayana; gido attiin neni minna daana; istti ubbayka afala mala wurana; neni istta carqqa mala laammana; isttika aadhdhana.

²⁷ Gido attiin awudekka neni nena; ne layththay mulekka wurenna.

²⁸ Nees ooththizayta nayti saroteththan daana; istta zereththayka ne sinththan minni eqqana.