ዬ ማጻፋ 10 - Geeshsha Maxaafa

¹ Abeet GODAWU! Ne ays haakkada eqqay? Meto wodenkka ays geemmay?

² Iita asati otoretteettes; hiyeesatakka yedeththeettes; istti haras woththida woximaden zaari oykettetto.

³ Iita asi ba wozina amon ceeqettees; Yoray GODAA cayeessinne kaddees.

⁴ Iita asi otoreteththan Xoossa koyenna; iza qofa ubbaan Xoossi deenna.

⁵ Ubbaa miishshi izas kumees; ne wogay izas gelenna; otoranchchay ne wogappe haakkees; hessa gishshas ba morkketa bollan izi qilccees.

⁶ Ba wozinan izi, «Tana aykkoyka qaaththenna; tana mulekka metoy gakkenna» giidi qoppees.

⁷ Iza doonan qanggeththi, wordoynne mandey kumides; iza inxarsan geneynne baleththoy dees.

⁸ Dere giddon geemason zuggi uttees; maadoy bayndayta dhayssanaas naagettees; xillo asata geeman wodhees.

⁹ Ba qotettizason geemmidi, hiyeesa oykkanawu gaammo mala zuggees; maadoy bayndayta ba woximaden oykkidi goochchi efees.

¹⁰ Maadoy bayndaynne hiyeesay iza kushen kundees; izikka istta nippi histti menththereththees.

¹¹ Iita asi ba wozinan, «Xoossi tana dogides; ba sinththaa taappe genththides; mulekka izi tana be7enna» gees.

¹² Abeet GODAWU! Denda. Xoossoo! Ne kusheza dhoqqu histta denththa; maadoy baynda metotanchchata dogoppa.

¹³ Iita asi Xoossa ays kadhizee? Ba wozinankka, «Xoossi tana qaxxayenna» ays gizee?

¹⁴ Gido attiin Xoossoo! Neni metozanne waayezakka beyaasa; neni ubba wode maaddanaas giiga uttadasa; neni yi7ota maaddaasa; maadoy bayndaytikka bana nees sheedhdheettes.

¹⁵ Gene asata wolqqa menththa; iita asata wolqqaka liiqisa; istti nam7anththo iita ooththontta mala istta ooso mala istta qaxxaya.

¹⁶ GODAY merippe mernaas kawotidi dees; hara kawoteththati iza biittafe dhayana.

¹⁷ Abeet GODAWU! Neni hiyeesata amo eraasa; istta woosaakka siyada minththeththaasa.

¹⁸ Oonikka istta yashisontta mala maadoy bayndaytassinne yi7otas ne pirda.