ሌሚሶ ማጻፋ 9 - Geeshsha Maxaafa

Aadho Erateththinne Eeyateth

¹ Aadho erateththaya baas keeth keexxadus; keeththas laappun tuussata essadus.

² Iza modhdho mehe shukkadus; woyne ushshu aggadus; maaddaka giigsadus.

³ Histtada asaa xeyganaas ba macca aylleta kiittadus. Iza katamayppe dhoqqa soon eqqada xeygadus;

⁴ «Inttenoo! Eray paccidayto haa gelite!» gadus. Eeyatakka iza,

⁵ «Haa yiidi ta qumaa miite; tani aggida woyne ushshaaka uyite!

⁶ Intte eeyateththa ogeza aggite; intte shemppora paxa de7ana; akeeka ogen hemettite» gadus.

⁷ Qilcciza as seeriza asi ubbay baas cashshe kallana; iita as zorizaadeyka baas kawuyana.

⁸ Qilcciza as zoroppa; ne iza zorikko izi nena ixxana. Aadho eranchcha as seera; ne iza seerikko izi nena dosana.

⁹ Aadho eranchcha as tamaarsa; histtiko izi kaseyssafekka aadho eranchcha gidana. Xillo as tamaarsa; histtiko izi erateth gujjana.

¹⁰ Aadho erateththas koyroy GODAAS yashshateththa; Geeshshaza eroykka akeeka.

¹¹ Ta gaason nees barey aduqqana; nees de7o layththayka gujettana.

¹² Neni aadho eranchcha gidikko go7ettana; ne qilccizaade gidikko qohettana.

¹³ Eeya maccassi wocama darawus; iza bana haarukku; iza aykkoka erukku.

¹⁴ Iza ba karen utta pe7awus; katama giddon dhoqqaso keza uttawus.

¹⁵ Heera aadhdhi ba oge bizayta xeygawus.

¹⁶ Izakka wozina pacetas, «Inttenoo! akeekay paccidayto taakko haa yiite.

¹⁷ Kaysi uyiza haaththi mal7ees; geeman miza qumaykka suukesees» gawus.

¹⁸ Gido attiin hayqqida asay heen de7izayssa, izi imaththatikka duufo giddon dizayssa istti erettenna.