ሌሚሶ ማጻፋ 8 - Geeshsha Maxaafa

Aadho Erateththa Saba

¹ Siyite! Aadho erateththaya ba qaala doqqu histta xeygekkee? Akeekaykka ba cenggurssaa dhoqqu histta sissekee?

² Oge doonan de7iza zumbullata bollanne daggala ogetan eqqawus.

³ Gimbeza lanqen katamata geliza pengen eqqada ba qaala dhoqqu histtada,

⁴ hayto asatoo! Tani inttena xeygays; tani asa zereth ubbaa xeygays.

⁵ Intteno akeekay paccidaytoo! wozinama gidite; intteno eeyatoo akeeka demmite.

⁶ Tani go7iza miish yootiza gishshas ezgite; ta doonappe suure yo7oy kezees.

⁷ Ta doonay tuma haasayees; ta metershatikka iita miish ixxeettes.

⁸ Ta doonappe keziza qaalati ubbay tuma; geella woykko bokka gidettenna.

⁹ Akeekay diza asas ta haasayay likke; erateththi dizaytas ta haasayan wordoy deenna.

¹⁰ Birappe aaththidi ta zore ekkite; muuruta worqqafe aaththidi erateth doorite.

¹¹ Ays giikko, «Tani aadho erateththi zo7o inqqufekka keeha al7ays; neni amottiza miish ubbayka tanara ginattanaas dandayenna.

¹² Tani aadho erateththi akeekara days; erateththinne wozinamateththi ta miishshata.

¹³ Godaas yashshateththi iita ixo; tani otoronne hallaca, menxe iitateththinne geella haasaya ixxays.

¹⁴ Zoreynne lo7o pirday tayta; taas akeekaynne wolqqay dees.

¹⁵ Kawoti tanan kawoteettes; dere ayssizayti suure woga kesseettes.

¹⁶ Daannati tani maaddiin deraa aysseettes; deraa haariza gita asati ubbay haareettes.

¹⁷ Tana siiqizayta tani siiqays; minni koyzayti tana demmana.

¹⁸ Dureteththinne bonchchoy ta matan deettes; wurontta aqotaynne injjey ta matanna.

¹⁹ Intte taappe demmiza go7ay muuruta worqqafe aadhdhees; ta imotaykka seerisi kessida birappe darees.

²⁰ Tani xilloteththa ogen hemettays; suure pirda kaallays.

²¹ Tana siiqizaytas tani dureteth immana; istta minjja keeththaaka tani kunththana.

²² «GODAY tana ba ooso ubbaafe koyro medhdhides; benippeka iza oosaas koyroy tana.

²³ Saloynne sa7ay medhettanaappe kase Beni mernaasofe tani shuumettadis.

²⁴ Wogga gita abbati baynda wode, haaththa pulttoti dhuuqqanaappe kase tani yelettadis.

²⁵ Zumatinne zumbullati medhettanaappe kase tani yelettadis.

²⁶ GODAY sa7anne sa7a bolla diza dembata woykko alame bolla diza gudullata medhdhanaappe kase tani yelettadis.

²⁷ GODAY salota miccida wodenne gita abbatappe bollara salo gufanththo giigsida wode tani heen de7ays.

²⁸ GODAY shaarata bollan woththida wode, gita abbaa pulttota dhuussida wode,

²⁹ abbaa haaththati banttas imettida zawappe pinnidi aadhdhontta mala zawa woththida wode, sa7as yoch yeggida wode,

³⁰ he wode tani iza matan waanna oosanchcha; ubbaa gallas tani ufayssan kumays; tanikka iza sinththan ufayettays.

³¹ Izas gidida alame ubbaan ta ufayettays; asaa naytankka ta ufayettays.

³² «Ha7ikka ta naytoo! Tani gizayssa ezgite; ta oge naagizayti anjjettidayta.

³³ Ta timirte siyite; aadho eranchchata gidite; wuda dhayopite.

³⁴ Tani yootizayssa siyiza asi, hach hach ta pengen beettiza asi, taso gelizasonkka naagiza asi anjjettidaade.

³⁵ Tana demmiday de7o demmees; GODAAPPE izi saba demmees.

³⁶ Gido attiin tana demmontta aggida asi bana qohees; tana ixxiza ubbati hayqo siiqeettes» gadus.