ሌሚሶ ማጻፋ 7 - Geeshsha Maxaafa

Laymappe Naagettana Mala Imettida Seera

¹ Ta naazoo! Ta qaala naaga; ta azazokka ne wozinan qum7a oykka.

² Ne paxa de7ana mala ta azazota naaga; ta timirtezakka ne ayfe ciro mala naaga.

³ Hayta ne biradhdhetan qachcha; ne wozinankka xaafa.

⁴ Aadho erateth ne taas michcho ga; akeekakka ne taas dabbo ga.

⁵ Istti nena layma maccassafenne ba qaalan baleththiza hawusha maccassafe naagana.

⁶ Issi gallas tani ta keeththa maskootezara kare xeelladis.

⁷ Akeekay paccida yelagata be7adis. Istta giddofe issoy keehi eeya.

⁸ He wodallay izi soo efiza oge baggara oykki bishe izi keeththa achchara aadhdhi bishin,

⁹ he wode sa7ay qammanaas lankilankishin, dhumay ayfe oykkishin,

¹⁰ issi maccassaya iza demmanaas kezadus; layma maccassa may7o may7ada baleththanaas murtta kezadus.

¹¹ Iza xalanne yeellay baynda maccassa; sohon woppu gaada uttuku.

¹² Iza issito ogen, issito gulan, issito dubbushan eqqada naagawus.

¹³ Iza he naaza shiishsha oykkada yeerawus; yeellay baynda iza ayfe tishshi histta xeellashe,

¹⁴ «Tani tason issifeteththa yarsho yarshanaas bessees; tani ta adina hach poladis.

¹⁵ Histtada nena xeellanawu ke7adis; nena keeha koyadis; ha7i beya nena demmadis.

¹⁶ Tani Gibxeppe yida alleqissiza ansolakka ta hiixan yeggadis.

¹⁷ Tani karbbe, almmuniyemenne qarafa geetettiza sawotappe oosettida shitto ta hiixan cacafadis.

¹⁸ Haa ya; ane wonttana gakkanaas siiqo aloos; qoomettidikka ufayettoos.

¹⁹ Ta keeththaaway soon deenna; haako dere bides.

²⁰ Miish karaxiite kunththi ekki bida gishshas aginay dors daganththontta simmenna» gadus.

²¹ Histtada ba mal7o haasayan iza baleththadus; ba liiqo inxarsankka cimmadus.

²² Shukas laagetti biza boora mala, woximaden oykettana biza cofosho mala heerakka aamusontta izo kaallidi bides.

²³ Wondafe yiishshi iza tire caddana gakkanaas, iza shemppo dhayssanayssa erontta dishe piradhdhidi yarden geliza kafo mala gidides.

²⁴ Ta naazoo! Ane ha7i siya; ta doonappe keziza qaalaakka ezga.

²⁵ Ne wozinay izikko booppo; iza biza bala ogen geloppa.

²⁶ Iza kawushshada olidayti undenna; iza wodhidayta qooday keehi daro.

²⁷ Izi soy duufon efiza oge; he ogey duge hayqoso gaththees.