ሌሚሶ ማጻፋ 6 - Geeshsha Maxaafa

Hachchas Hachchas Bessiza Zore

¹ Ta naazoo! Neni ne shoorozas waase gelidaa gidikko, hara asa gishshas neni kushe baqqa caaqqidaa gidikko,

² neni gelida qaalan oykettidaa gidikko, ne doonappe ke7ida qaalan ne oykettidaa gidikko,

³ ta naazoo! Neni ne shooroza kushen kundida gishshas nena ashshanaas baada iza sinththan kunda; ne shoorozakko baada shoobba.

⁴ Hessaththo ooththontta dashe dhiskofa; ne siphinththati liphopetto.

⁵ Shankkanchchatappe genessi kessi ekki attiza mala, yarden oykettontta attida kafo mala nena ashsha.

⁶ Nenoo azallazoo! Cunccalletaakko ba; histtada isttafe tamaarada aadho eranchcha gida.

⁷ Cunccalletas azazizay deenna; istta haarizay deenna.

⁸ Gido attiin banttas maana miish bone shiishsheettes; kath shiishshiza wode banttas kath shiishsheettes.

⁹ Nenoo azallazoo! Neni awude gakkanaas dhiskanee? Dhiskofekka ne awude beegganee?

¹⁰ «Tani guuththara dhiska ekkana; guuththara liipha dendana; ta kushe borkotada guuththara shempa ekkana» ne gishin,

¹¹ he wode manqoteththi panga mala, pacey ola miishsha oykkida asa mala ne bolla puttu gaana.

¹² Womaleynne menxe iita asi yuuyi yuuyidi iita qaala haasayzay,

¹³ ba ayfera qim7otizay, ba tohon bessizay, ba biradhdhetankka malatizay,

¹⁴ ba wozinan iita miish woththi denththi qoppizay ay wodekka oosh denththees.

¹⁵ Hessa gaason bashshi akeekontta iza bolla yaana; izi hassa7ay baynda meqqana; meqqidikka paxenna.

¹⁶ GODAY ixxiza usuppun yo7oti deettes; laappunththaza keehi harasettees.

¹⁷ Otoreteththan xeelliza ayfe, wordotiza inxars, xillo asata wodhiza kushe,

¹⁸ iita miish qoppiza wozina, iitaso eesotiza tohota,

¹⁹ wordo bolla wordo gujji gujjidi yootiza wordo markka, ishantta giddon oosh medhdhiza asa.

Laymappe Haako

²⁰ Ta naazoo! Ne aawa azazo pola; ne aaya tamaarsidayssaka aggofa.

²¹ Istta ubbato ne wozinan oykka; ne qoodhenkka qachcha.

²² Neni hemettiza wode istti nena kaaleththana; neni ichchiza wode istti nena naagana; neni beegottiza wodekka istti nena zorana.

²³ Ays giikko ha azazoti nees xomppe; timirtetikka poo7o; qasse seeraykka de7okko efiza oge.

²⁴ Ha azazoti iita maccassafe nena naagana; doonan cimmiza hawusha maccassafekka naagana.

²⁵ Izi lo7eteththa ne wozinan amottofa; izi qim7oteththan oykettofa.

²⁶ Issi addey bana bayza diza maccassayo guuththa miishshan demmanaas dandayees; asa machchi geedo kaaloy nees shemppo dhayssana.

²⁷ Issi asi tama idimmiin iza may7oy meetettontta attanaas dandayzee?

²⁸ Issi asi bonqo tama yedhdhi bishin iza tohoy xuugettontta attana dandayzee?

²⁹ Asa machcho laggeththiza asi hessa mala; izo bochchiza ubbay qaxxayettontta attenna.

³⁰ Kaysoy gafa attanaas kaysikko asay iza kadhenna.

³¹ Gido attiin izas diza aqota ubbaa oychchikokka izi oykettidaa gidikko laappun kushe qanxxana bessees.

³² Layma laymatiza asas wozinay pace; hessaadey barkka ba shemppo dhayssees.

³³ Bukaynne kawushshateththi izas qaada; yeellateththi izappe mulekka qucettenna.

³⁴ Qanaatey azina hanqettana mala denththeththees; izi halo kessiza wode izas qadhettenna.

³⁵ Izi ay edakka ekkenna; ay keena imotaykka iza hanqo doshisenna.