ሌሚሶ ማጻፋ 5 - Geeshsha Maxaafa

Laymateththafe Naageteth

¹ Ta naazoo! Ta aadho erateththaa ne wozinan woththa; tani akeekan yootiza qaala lo7eththa ezga.

² Hessika wozinamateththi nees miish gidana malanne ne metershati erateth naagana malassa.

³ Layma maccassa inxarsafe eessa ililoy xokkees; izi haasayay oyssafekka aadhdhi shuggees.

⁴ Gido attiin iza wurseththan godare uuththa mala cammawus; nam7u baggara qanxxiza qara mashsha mala.

⁵ Izi tohoti duge hayqoso beettes; izi tanggoy sitti histti duge duufon kaaleththees.

⁶ Iza de7o oges wudu guukku; izi ogeti geella; gido attiin geella gididayssaka iza erukku.

⁷ Ta naytoo! Tana ezgite; ta yootiza qaalaappe ke7opite.

⁸ Intte oge izippe haassite; izi pengerakka aadhdhofte.

⁹ Hessika intte intte goobateththa haratas, intte layththaaka menxe iitatas intte immontta malassa.

¹⁰ Allagati intte aqotan kaa7ontta malanne intte daaburankka hara asasoy duretontta malassa.

¹¹ Intte ashoy wuriin, intte meqeththi gilqiin wurseththa layththan intte goottarana.

¹² Qasseka neni, «Tani ays seera ixxadinaa! Ta wozinaykka zore ays kadhidee!

¹³ Tana tamaarsizayti yootidayssa ekkabeekke; tana zorizayta zorezakka ezgabeekke.

¹⁴ Hessa gishshas tani shiiqida duulata sinththafe dhayana matadis» gaana.

¹⁵ Neni eelissida ne pultto haaththafe uyada aliza mala ne machcheys ammanettada izi siiqon ala.

¹⁶ Beetta beetta maccassi uyiza pultto haath gidoppa.

¹⁷ Nenateththaa ne machcheys naaga; hara maccassara zin7ofa.

¹⁸ Ne machcheya nees anjjettida pultto gidu; yelagateththan neni ekkida ne machcheyra ufayetta.

¹⁹ Lo7iza gaara malanne ufayssiza genessa mala, izi dhanththati ubba wode nena aletto; izi siiqoy nena ubbato oykko.

²⁰ Ta naazoo! Layma maccassay siiqon ays maththottay? Hara asa machchira ays qoomettay?

²¹ Gaasoykka asi ooththiza ubbaa GODAY beyees; izi hemettiza hemetaa ubbaa pilggi xeellees.

²² Nagaranchcha izi ooththida nagaray zaari oykkees. Iza nagara gitey iza qachchees.

²³ Izi ba eeyateththa daron oge balana; bana haarana dandayontta aggida gishshas izi hayqqana.