ሌሚሶ ማጻፋ 4 - Geeshsha Maxaafa

Aadho Erateththa Go7a

¹ Ta naytoo! Intte aawa zore siyite; wozinan woththi ezgite; akeekakka inttes miish histtite.

² Tani inttes lo7o timirte immiza gishshas ta timirte aggofte.

³ Tani ta hu7enkka ta aawaas yelaga naa; ta aayeyska mexi issi naa.

⁴ Ta aaway tana tamaarsishe, «Ta qaala kumeththa wozinan oykka; ta azazotakka naaga; ne histtiko paxa de7ana.

⁵ Aadho erateththinne akeeka oykka; ta qaala dogoppa; izippeka kare kezoppa.

⁶ Aadho erateth aggofa; iza nees gondalle gidana; izo siiqa; izakka nena naagana.

⁷ Aadho erateththi bayra; hessa gishshas izo demma. Akeekay ne aqoza ubbaa ekkizaa gidikkoka iza demma.

⁸ Neni aadho erateth bonchcha; iza nena dhoqqu dhoqqu ooththana; neni izo idimma; iza nena bonchchana.

⁹ Iza ne hu7en saba akilile woththana; bonchcho kallachchaka immana» gees.

¹⁰ Ta naazoo! Ta gizayssa ezga; ta qaalaakka ne wozinan woththa; ne layththi aduqqana.

¹¹ Tani nena aadho erateththa oge kaaleththana; suure ogekka bessana.

¹² Ne hemettashe dhuphettaka; woxxikokka kundaka.

¹³ Ta timirte lo7eththa oykka; izo yeddofa; iza nees de7o gidida gishshas izo naaga.

¹⁴ Nagaranchchata oge yedhdhofa; iita asata ogenkka hemettofa.

¹⁵ Izippe haakka; izin hemettofa; izippe guye simma; histtada ne ogeyra ba.

¹⁶ Istti iita ooththontta dishe dhiski erettenna; as dhupheththontta dishin dhiskoy istta ayfen yeenna.

¹⁷ Istti iitateth kaththa mala meettes; genekka ushsha mala uyeettes.

¹⁸ Xillota ogey seeta gallas gakkanaas poo7i poo7i biza mallado xalqqe mala.

¹⁹ Gido attiin nagaranchchata ogey sakkanna dhuma mala; istti aazan dhuphettanaakkoka erettenna.

²⁰ Ta naazoo! Ta gizayssa akeeka; ta qaalaakka lo7eththa ezga.

²¹ Ne ayfe sinththafe haassofa; ne wozinan woththa.

²² Gaasoykka istti demmiza asas de7o immeettes; istti asateththaska payyateth immeettes.

²³ Ubbaafekka bollara neni ne wozina minththada naaga; ays giikko de7oy izappe pulttees.

²⁴ Ne doonappe gene haasaya digga; iita haasaya ne metershafe haassa.

²⁵ Ne ayfeti sitti giidi sinth xeelletto; tishshi histtada ne sinththan dizayssa xeella.

²⁶ Ne tohos oge giigsa; suure oge xalla hemetta.

²⁷ Ushach hadirsi gooppa; ne toho iitappe naaga.