ሌሚሶ ማጻፋ 31 - Geeshsha Maxaafa

Kawo Limu7eele Aaya Ba Naazas Immida Timirte

¹ Kawo Limu7eele aaya kawo Limu7eele tamaarsida timirtey hayssafe kaallidayssa.

² «Ta naazoo! Ta uloppe wodhdhida ta naazoo! Tani adinetta yelida ta naazoo!

³ Maccassan ne wolqqa wursofa; kawota bashshiza miishshan ne akata dhayssofa.

⁴ «Limu7eele hayssi kawotas bessenna; kawoti woyne ushshu uyanaas bessenna; dere ayssizayti maththosiza ushshu yaaretanaas bessenna.

⁵ Istti uyiza wode wogaa baletteettes; qohettidayta maata sugeettes.

⁶ Hayqqana hanizaytas maththosiza ushshu meto bolla dizaytas woyne ushshu immite.

⁷ Istti uyidi bantta manqoteththa dogetto; bantta tuggaka zaari qoppofetto.

⁸ «Bantta gishshas haasayanaas dandayonttaytas neni haasaya; metotanchchata maata gishshas neni mootetta.

⁹ Haasayada isttas suure pirda pirda; hiyeesatanne metotanchchata maata bonchchisa» gaada tamaarsadus.

Wozinama Machcho

¹⁰ Wozinama machcho ooni demmanawu dandayzee? Iza zo7o inqqufekka keeha aadhdhawus.

¹¹ Izi keeththa aaway izo ubbaa miishshankka ammanees; izas aykkoyka paccenna.

¹² Iza ba de7o layth ubbaan izas lo7o attiin iita miish ooththuku.

¹³ Dorsa iskefenne talbba buuxa ekkada, ooso dosiza ba kushen suqawus.

¹⁴ Iza zal7anchchata markabe mala; ba kath haakko biittafe ehawus.

¹⁵ Iza ba soo asas quma kaththanaassinne ba macca aylletas ooso shaakka immanaas, sa7ay buro wonttana gishin dendawus.

¹⁶ Iza barkka qoppada goshsha gade shammawus; ba demmida miishshan woyne tokkawus.

¹⁷ Iza minnada ba ooso polawus; izi qesetikka oosos mino.

¹⁸ Iza ba oosos wodhey dizayssa akeekawus; omarsika izi xomppey to7enna.

¹⁹ Iza ba liqaqan suqawus, ba afala daddawus.

²⁰ Iza hiyeesatas ba kushe miccawus; metotanchchatas kiyateth immawus.

²¹ Izi soo asay ubbay ho7iza may7o may7ida; hessa gishshas iza shachchi bukkikokka hirguku.

²² Hiiththan ongiza may7o ooththawus; laynonne ochcha teera misatiza may7o may7awus.

²³ Dere cimati dubbusha shiiqizason izi keeththa aaway bonchchettida asa.

²⁴ Laynoppe seelo may7ota ooththada bayzawus; zal7anchchataskka dancco dadda shiishshawus.

²⁵ Iza minonne puulara diza maccassa; iza yiza layththata ufayssan mokkawus.

²⁶ Aadho eran iza haasayawus; izi inxarsafe suure zorey ke7ees.

²⁷ Iza ba soo asaa hano lo7eththa kaallawus; azalla hanoy izi bollan beetti erenna.

²⁸ Izi nayti izo, «Anjjettidaree» geettes; izi keeththa aawaykka izo galatishe,

²⁹ «Lo7o miish ooththida daro maccassati deettes; gido attiin neni istta ubbaafe aadhdhaasa» gees.

³⁰ Mala lo7oy baleththees; puulaykka qokkees; gido attiin GODAAS yayyiza maccassi iza anjjettidaaro.

³¹ Izis bessiza imota immite; iza ooththida oosoy ubbay dubbushan izo galatisso.