ሌሚሶ ማጻፋ 30 - Geeshsha Maxaafa

Agurey Haasayda Leemisota

¹ Hayssafe kaallidi xaafettidayssi Yaaqe naa Agurey haasayda leemisota. Agurey Itti7eelessinne Ukaalas hayssa haasaydes.

² «Tani asa ubbaafekka eeya darays; asas de7iza akeekay taas baawa.

³ Tani aadho erateth tamaarabeekke; Geeshshaza gishshassika tani eriza miishshi deenna.

⁴ Salo pude ke7idi duge wodhdhiday oonee? Carko ba kushen oykkiday, haath ba afalan yiiciday sa7a gaxa iza soon soon woththiday oonee? Ane erikko iza sunth taas yoota; Iza naaza sunththi oona geetettizee?

⁵ «Xoossay yootiza qaalay ubbay tuma; Izan ammanettiza ubbaas izi gondalle.

⁶ Iza qaala bolla aykkoka gujjofa; gujjiko izi nena seerana; neni wordanchcha gididayssaka izi qonccisana.

⁷ «GODAWU! Tani nena nam7u miish oychchays; tani hayqqana gakkanaas istta tana diggofa.

⁸ Tani as cimmontta malanne wordo haasayontta mala tana naaga; tana dure woykko manqo histtofa; gido attiin hachchis hachchis gidiza kath taas imma.

⁹ Histtontta aggiko tani keeha kallada nena kaddana; ‹GODAY izi oonee?› gaana; woykko manqada kaysana; histtada tani Xoossa sunththaa caysana.

¹⁰ «Nena qanggontta malanne izi qanggiin nees gometontta mala, aylle iza goda sinththan iitan denththofa.

¹¹ Ba aawa qanggizanne ba aayokka anjjontta yeletay dees.

¹² Tuna gidi uttidi banttana geeshsha mala qoodiza asati deettes.

¹³ Otoron kumida asatinne as kadhidi xeelliza asati deettes.

¹⁴ Hiyeesatanne metotanchchata dere giddofe dhayssanaas istta achchay mashsha mala gidida istta gaaginay biillama mala gidida asati deettes.

¹⁵ «Ulos nam7u macca nayti deettes. Istti, ‹Nuus imma! Nuus imma!› giidi waasseettes. Mulekka kalli erontta heedzdzati deettes; oydanththozi qasse mulera, ‹Gidana› gi erenna.

¹⁶ Hessanttika duufo, maynida ulo, haaththi kalli erontta mela biittanne, ‹Taas gidana!› gi erontta tama.

¹⁷ «Ba aawa qidhiza naa ayfenne, ba aayo kadhiza naa ayfe kelkan de7iza quuroti woocana; iza ashoza ankkoti maana.

¹⁸ Tana keehi malalisiza heedzdzu miishshati deettes; oydanththozi ubbaarakka taas gelenna.

¹⁹ Hessanttika golleti salora paalliza paalo, shooshshi shuchcha bollara sololu gi buus, markabey abbaa bollara biza buus addey macca naa siiqo demmanaas haniza hanota.

²⁰ «Layma maccassaya haniza hanoykka hessa mala. Iza muussa mawus; gido attiin midaappe guyen, ba doona quccada, ‹Tani aykkoka moorabeekke› gawus.

²¹ «Heedzdzu yo7otan biittay qaaxxees; oydanththoza ubbaaka tookkanaas dandayenna.

²² Hessanttika aylley kawotida wode, eeyay kath kallida wode,

²³ asi ixxida maccassaya adde gelida wodenne macca ashkariya ba godatteyo laattida wode haniza hanota.

²⁴ «Sa7a bolla oyddu guuththa medhetati deettes; gido attiin istti keehi aadho eranchchata.

²⁵ Hessanttika cunccalleti wolqqay baynda medheta; gido attiin banttas miza miish bone shiishshi dagaseettes.

²⁶ Guppaleti guuththa wolqqay de7izayta; gido attiin bantta keeth zaalla giddon keexxeettes.

²⁷ Booletas kawoy deenna; gido attiin istti ubbayka maaran maaran zatteettes.

²⁸ Zareti kushen oykkiinkka oyketteettes; gido attiin istti kawo keeththankka de7eettes.

²⁹ «Bantta maata bessishe hemettiza, heedzdzu medhetati deettes; oydanththozikka puulattidi hemettees.

³⁰ Hessanttika do7a ubbaafe wolqqamanne aykkoska yayyidi baqati erontta gaammo.

³¹ Maccassata giddon kososi hemettiza adde kutto, deysha orgenne ba olanchchatan ajjabettida kawo.

³² «Neni eeyada otorettidaa gidikkonne iita miish ooththanaas halchchidaa gidikko ane takki gaada qoppa.

³³ Maaththi bukkiin oysi ke7iza mala, siidhe iccinkka suuththi yiza mala hanqo denththeththiko oosh medhdhees.»