ሌሚሶ ማጻፋ 3 - Geeshsha Maxaafa

Godaan Ammaneteth

¹ Ta naazoo! Tani nena tamaarsizayssa dogoppa; ta azazotakka ne wozinan woththa.

² Istti ne layth adussana; ishalo de7onne saroteth nees gujjana.

³ Siiqoynne tumateththi neeppe haakkofetto; istta ne qoodhen qachcha; ne wozinankka xaafa.

⁴ Histtiko neni Xoossa sinththaninne asaa sinththan sabettananne lo7o sunth demmana.

⁵ Neni polo wozinan GODAAN ammanetta; neni ne akeekan zemppofa.

⁶ Neni biza oge ubbaan iza sinththasa; izikka ne biza oge suurisana.

⁷ Nerkka nena aadho eranchcha gooppa; GODAAS yayya; iitappeka haakka.

⁸ Hessi ne bollaa payya woththana; ne meqeththatakka xalisana.

⁹ GODAA ne aqotan bonchcha; biittay nees immiza ayfe ubbaafe xeeraa izas imon bonchcha.

¹⁰ Ne hessaththo ooththiko ne gootarati kumi palahana; neni woyne ushshu agizasoti cippi gi kumana.

¹¹ Ta naazoo! GODAA seera kadhoppa; izi nena hanqiza wodekka lanccofa.

¹² Aaway ba siiqiza naa seerizayssaththo GODAYKKA ba dosiza naa seerees.

¹³ Aadho erateth demmanaas woxxiza asi, akeekakka baas miishshe ooththiza asi anjjettidaade.

¹⁴ Gaasoykka izippe demmiza go7ay birappe demmiza go7appe aadhdhees; izippe beettiza go7ay worqqafe beettiza go7appe aadhdhees.

¹⁵ Aadho erateththi zo7o inqqufe keehi al7o; neni demmanaas amottiza ubbay izira ginattenna.

¹⁶ Iza ushachcha kushen adussa layth, hadirsa kushen aqotanne bonchcho oykkadus.

¹⁷ Izi ogeti ufayssiza ogeta; iza hemettiza oge ubbayka saro.

¹⁸ Iza bana idimmizaytas de7o miththa; izo oykkizaytikka anjjettana.

¹⁹ GODAY ba aadho erateththan sa7a medhdhides; ba akeekankka salota istti dizason minththides.

²⁰ Shaafati iza erateththan goggeettes; shaarati ira immeettes.

²¹ Ta naazoo! Suure pirdanne shaakki ero naaga; istti ne sinththafe haakkofetto.

²² Istti nees de7o gidana; ne qoodheskka aleqo gidana.

²³ He wode neni ogen hirgay baynda hemettana; ne tohoykka dhuphettenna.

²⁴ Neni ichchida wode babbaka; ichchadakka mal7o dhisko dhiskana.

²⁵ Akeekontta gakkiza metonne iitata bolla gakkiza dhayssas babbaka.

²⁶ Ays giikko GODAY nees ammanettizaade gidana; ne tohoy woximaden oykettontta mala izi nena naagana.

²⁷ Nees maaddana wolqqay dishin maado bessizaytas lo7o ooso aggofa.

²⁸ Ha7i nees dishin ne shoorozas, «Simmada ya; tani nees wonto immana» gooppa.

²⁹ Nenan ammanettidi ne matan dishin ne shooroza bolla iita miish ooththanaas halchchofa.

³⁰ Nena qohontta as gaasoy baynda coo mootoppa.

³¹ Gene ooththiza asata qullofa; istta iita ogekka kaallofa.

³² Gaasoykka GODAY iita ooththizayta ixxees; gido attiin suuretas izi ba wozina qofa qonccisees.

³³ GODAA qanggeththi iita ooththizayta keeththanna; gido attiin iza anjjoy xillotasonna.

³⁴ Otoreteththan qilccizayta bolla GODAYKKA qilccees; gido attiin banttana kawushshizayta bonchchees.

³⁵ Aadho eranchchati bonchcho laattana; eeyati gidikko kawushshateththas aadhdhi imettana.