ሌሚሶ ማጻፋ 29 - Geeshsha Maxaafa

¹ Daro wode seeriin ixxidi ba morge zoodisida asi hassa7ontta meqqana; hessaades paxeteththika deenna.

² Xillo asati maata oykkiza wode asay ufayettees; gido attiin iita asati biitta haariza wode asay oolees.

³ Aadho erateth dosiza asi ba aawa ufayssees; gido attiin laymatara laggetizay ba aqota dhayssees.

⁴ Tumaa pirdiza kawoy ba dere woppu histtees; gido attiin matta7e maanaas yiiqetizay ba deraa laallees.

⁵ Ba laggezas cimo haasayza asi iza tohos woximade waaxees.

⁶ Iita asi barkka ba nagaran oykettees; gido attiin xillo asi ufayetteessinne yexxees.

⁷ Xillo asi hiyeesatas suure pirday pirdettana mala qoppees; gido attiin iita asi hessa mala wudukka geenna.

⁸ Miirizayti kataman shiro denththeettes; gido attiin aadho erateththi diza asati hanqo irixiseettes.

⁹ Aadho erateththi diza asi eeya asara pirdaso biikko eeyay hanqetteessinne qidhees; izas saroykka deenna.

¹⁰ Suuth gussanaas jaamiza asati suure as ixxeettes; qasse xillo asaakka wodhanaas koyeettes.

¹¹ Eeya asi zaway baynda hanqeettes; gido attiin aadho eranchchay ba hanqo mittees.

¹² Dere haarizaadey wordo yo7o ekkiko iza shuumeti ubbay iita gideettes.

¹³ Hiyeesaynne as naaqqizaades koththa miishshi dees; GODAY nam7ataska xeelliza ayfe immides.

¹⁴ Issi kawoy hiyeesas suure pirdiko iza kawoteththa araatay mernaas minni daana.

¹⁵ Xunduqi dishoy naytas aadho erateth immees; gido attiin yeda diccida nay ba aayo kawushshees.

¹⁶ Iita asati maata oykkiza wode nagaray darees; gido attiin xilloti istta kundeththaa be7ana.

¹⁷ Ne naa seera; histtiko neni saro demmana; izi nena ufayssana.

¹⁸ Ajjuutay bayndason derey yeda daana; gido attiin wogaa naagiza asi anjjettidaade.

¹⁹ Ashkaray coo doonan yootiin xalla erenna; yo7oy izas gelizaakkoka izi azazettenna.

²⁰ Eeson haasayza as beyay? Izappe eeya asas hidotay dees.

²¹ Asi ba aylle naateteththafe doommidi al7ison dichchiko wurseththan izaade bolla ceecey gakkana.

²² Hanqettiza asi oosh denththeththees; elle yiillotiza asi daro nagara ooththees.

²³ Otoroy as kawushshees; gido attiin ashketeththi bonchchisees.

²⁴ Kaysora zuppetiza asi bana ixxiza asa; qanggi caaqisishin siyishekka izi co7u gees.

²⁵ Asas yayyizayssi izaades woximade gidees; gido attiin GODAAN ammanettiza asi saron de7ees.

²⁶ Daroti dere haarizayta sinththan erettana koyeettes; gido attiin asas suure pirday GODAA achchafe beettees.

²⁷ Xilloti as baleththizayta shaatetteettes; Iitati suure asata ixxeettes.