ሌሚሶ ማጻፋ 28 - Geeshsha Maxaafa

¹ Iita asi oonikka yedeththontta baqatees; gido attiin xilloy gaammo mala wozina kumeththa.

² Derey makkalliko haarizay corattees; Gido attiin era asinne akeekiza asi woga essees.

³ Hiyeesata un7eththiza daannay kath dhayssiza wolqqama ira mala.

⁴ Woga bonchchontta asi mooranchchata sabbees; gido attiin wogaa bonchchizay istta qofa palqqees.

⁵ Iita asatas suure pirday gelenna; gido attiin GODAAS goynnizayti ubbaaka ereettes.

⁶ Geella as gidi uttidi dure gidanaappe borey baynda hiyeesa gideththi lo7o.

⁷ Wogaa naagiza nay akeekanchcha; gido attiin ganjamatara zuppetizay ba aawa yeellasees.

⁸ Bessontta dishon ba aqota dagasiza asi he aqota hiyeesas kiyiza asas shiishshees.

⁹ Wogaa siyanaappe ba hayth wora zaariza asa woosay Xoossa harassees.

¹⁰ Suureta iita oge kaaleththiza asi ba bookkida ollan kundana; gido attiin geeshsha asi lo7o miish laattana.

¹¹ Dure asi bana aadho eranchcha giidi qoppees; gido attiin akeekay de7iza hiyeesay iza paaccees.

¹² Xilloti xoonida wode asay ubbay ufayettees; gido attiin iitati maata oykkida wode asay baqatees.

¹³ Ba nagara genththiza asi aacenna; gido attiin paaxizaynne nagara aggizay maarettana.

¹⁴ GODAAS ubbato yayyiza asi anjjettidaade; gido attiin ba wozina dammasiza asi meton gelana.

¹⁵ Hiyeesa haariza iita daannay xaaggiza gaammonne guppi oykkiza zardo mala.

¹⁶ Wozinay paccida daannay menxe iitees; gido attiin bessontta go7a ixxizaadey daro layth de7ees.

¹⁷ As wodhida asi hayqqana gakkanaas toylattishe dees; iza oonikka shiishshi ekkenna.

¹⁸ Borey baynda hemettiza asi qohettontta attana; gido attiin geella asi issi gallas kundana.

¹⁹ Ba gade goyiza mino asi kath kallees; gido attiin hada yo7o kaalliza asi manqoteththaafe ke7enna.

²⁰ Ammanettida asi keehi anjjettana; gido attiin durettanaas jaamizay qaxxayettontta attenna.

²¹ Shaakkidi maadoy lo7enna; gido attiin asi guuththa kaththas giidi mooro ooththees.

²² Uuzettiza asi durettanaas jaamees; bana hiyeesateththi oykkanayssaka erenna.

²³ As coo sabbiza asappe seeriza asi guyeppe dosettees.

²⁴ Ba aawappenne ba aayppe kaysidi, «Tani aykkoka nagara ooththabeekke» giza asi bashshiza asara issi mala.

²⁵ Yiiqey asi oosh denththees; gido attiin GODAAN ammanettizay anjjettees.

²⁶ Banan ammanettiza asi eeya; gido attiin aadho erateththan hemettizay saron de7ees.

²⁷ Hiyeesas immiza asas paccenna; gido attiin istti be7ishe be7onttaththo hanizaade qanggeththi gakkana.

²⁸ Iita asati maata demmiza wode derey baqatees; gido attiin istti dhayza wode xilloti coratteettes.