ሌሚሶ ማጻፋ 27 - Geeshsha Maxaafa

¹ Wontoyssan ceeqettofa; wonto aazi hananaakko ne erakka.

² Nena hara asi galatoppe attiin nerkka nena galatoppa; hara asi nena sabbofe attiin neni nerkka nena sabbofa.

³ Shuchchi deexo; anccoy tooko; gido attiin eeya asi denththiza ooshshi nam7atappeka deexxees.

⁴ Sheney menxe iita; hanqoy menxe iita; qanaate sinththan eqqi dandayanay oonee?

⁵ Geemmida siiqoppe qonccen seeriza seeray lo7o.

⁶ Morkkey nena daroto yeeranaappe siiqoy nena dechchizayssi kiya.

⁷ Kallida as eessa ililoy iitees; gido attiin gafida as gara mala cammiza miishshika mal7ees.

⁸ Ba soo aggidi yuuyiza asi, ba keeththafe haakka paalliza kafo mala.

⁹ Shittoynne exaaney as ufayssizayssa mala, siiqo lagge zoreykka ufayssees.

¹⁰ Ne laggenne ne aawa lagge aggofa; nena metoy gakkiza wode ne ishaakko booppa. Haahon diza ishappe nees matan diza shooroy kiya.

¹¹ Ta naazoo! Neni aadho eranchcha gida; ta wozina ufayssa; histtiko tana kadhizayta oyshakka zaarana.

¹² Cincca asi metoy yiza wode be7idi qotettees; gido attiin akeekay paccida asi meto gars bi gelees; histtidi guyeppe qohettees.

¹³ Erontta asas hurbuta geliza asa may7o qaara ekka; hawusha maccassas waase geliza asa may7o oykka.

¹⁴ Maalado wonttara ba qaala dhoqqu histtidi ba shooro anjjoy qanggeththa mala qoodettees.

¹⁵ Ubbaa wode oosh ooyettiza machcha ira gallas pacey baynda aaththiza keeththa mala.

¹⁶ Carko teqqanaas woykko zayte cucumidi oykkanaas dandayettonttayssa mala izo co7u ooththanaas dandayettenna.

¹⁷ Biratay birata qarasiza mala asikka issoy issaa qarasees.

¹⁸ Balase miththayo ishalsidi naagida asi izi ayfe maana; ba godaas ooththiza asi bonchchettana.

¹⁹ Haaththay heregaththo sinth bessiza mala asa wozinay izaade kando bessees.

²⁰ Hayqoynne Bashshi kalli erettenna; hessaththoka asa ayfey kallenna.

²¹ Biraynne worqqay taman paacettidi geeyza mala asikka ba ekkiza galatan paacettees.

²² Eeya as kaththa mala udulan yeggada, udula miththan caddizaakkoka izappe eeyateththi kichchenna.

²³ Ne dorsati de7iza hanota lo7eththada era; ne wudekka wozinappe heemma.

²⁴ Ays giikko dureteththi mernaas de7enna; kallachchayka yeletappe yeleta gakkanaas minni de7enna.

²⁵ Mela maatay buucettidaappe, aaca maatay ke7idaappe, zumbullata bollan de7iza maatay shiiqidaappe guyen,

²⁶ dorsata iskefe neni nees may7o kessana; deyshatan nees goshsha gade shammana.

²⁷ Attida deyshata maaththi neessinne ne soo asas, ne macca aylletaskka quma gidanaas kumi palahana.