ሌሚሶ ማጻፋ 26 - Geeshsha Maxaafa

¹ Bonen shach, kath shiishshiza wodenkka iray koshshonttayssa mala, eeyas bonchchoy koshshenna.

² Kafoti yaanne haa paallishe as qohonttayssa mala, gaasoykka baynda qanggiza qanggeththi as gakkenna.

³ Parasi lisso, hares ancafa koshshizayssa mala, eeya zokkozas durqqa koshshees.

⁴ Eeya asas iza eeyateththa mala zaaroppa; zaarikko nenikka iza mala gidana.

⁵ Gidikkoka eeyas iza eeyateththaa bessa; histtontta aggiko izi bana eranchcha mala qoodana.

⁶ Eeya asa bolla kiita yedoy barkka ba tohota qanxxizayssa mala; woykko wodhiza marze ushsha mala.

⁷ Eeya asa leemisoy silida toho mala.

⁸ Eeya asas bonchcho imoy yanbarsha bolla qachchi woththidi yuushshiza shuchcha mala.

⁹ Eeya asa leemisoy maththottida asa kushen eqqida agunththa mala.

¹⁰ Eeya as woykko baas ogera kanththi biza as oosos qaxariza asi ba wondafen coo demmida as dukki madunththiza asa mala.

¹¹ Kanay ba cooshshi simmi laacciza mala, eeyay ba eeyateththa ooso zaari zaari yeggees.

¹² Barkka bana, «Tani aadho eranchcha» giza as beyadii? Izappe eeya asas lo7o qaaday dees.

¹³ Azallay, «Ogen gaammoy dees; yashshiza gaammoy wogga ogen yuuyees» gees.

¹⁴ Pengey ba maaxafa bollan yaanne haa qaaxxiza mala azallaykka ba hiixan yaanne haa shiretti shiretti wodhdhees.

¹⁵ Azallay ba kushe maaddan yeddees; gido attiin pude ba doonan zaaranaas waayettees.

¹⁶ Azalla asi akeekan yootiza laappun eranchchatappe bana aadho eranchcha giidi qoppees.

¹⁷ Bana gaththontta asa yo7on guppi geliza asi kana hayth oykkiza asa mala.

¹⁸ Gooyiza asi tamaa xiifa oliza mala woykko wondafe dukkiza mala;

¹⁹ «Tani kaassas ooththadis» gishe ba laggeza cimmiza asikka hessa mala.

²⁰ Miththi wurikko tamay to7ees; zigirssi dhaykko ooshshi attees.

²¹ Xiixinththi bonqo darssizayssa malanne miththi tamaa darssizayssa mala, doonama asi oosh darssees.

²² Zigirsanchcha qaalay mal7o qumaa mala asas duge marace gakkees.

²³ Wozinan iita miishshi dishin, ba inxarsan liiqo qaala haasayza asi biran meeshettida mana miishsha mala.

²⁴ Gene asi ba doonan cimees; gido attiin ba wozinan iitateth xunttees.

²⁵ Iza wozinan laappun tunateththi kumi uttides; hessa gishshas izi lo7o qaala haasaykkoka ammanoppa.

²⁶ Izi ba gene baleththon genththanaas dandayees; gido attiin izi ooththida iitateththi duulatan qonccana.

²⁷ Haratas olla bookkiza asi he ollan baas kundana; harata bolla shuch bululiza asa bolla he shuchchay simmi iza bolla kundana.

²⁸ Wordotiza inxarsi ba qohida asata ixxawus; cimmiza metershika bash ehawus.