ሌሚሶ ማጻፋ 24 - Geeshsha Maxaafa

¹ Ta naazoo! Iita asata mala gidarkina gooppa; Isttara laggeteththika nena lo7oppo.

² Istti ubbato makkalla miish maqetteettes; bantta inxarsankka gene haasayeettes.

³ Keeththi aadho erateththan keexettees; akeekankka minnees.

⁴ Eray de7ikko, keeththi al7oninne lo7o miishshan kumees.

⁵ Wozinama asas gita wolqqay dees; eranchcha asikka minoteth gujjees.

⁶ Ola olettanaas nees lo7o zore xoono demmanaaskka daro zoranchchata koshshees.

⁷ Eeya asi aadho erateththafe keehi haahon dees; duulata sinththan eqqidi haasayana dandayenna.

⁸ Iita ooththanaas halchchiza asi «Genanchcha» geetettees.

⁹ Eeyateththa qofay nagara; qilccizaade asi ixxees.

¹⁰ Neni meto gallas laafikko, ne wolqqay ay mala guuththee?

¹¹ Hayqos laagetti bizayta ashsha; shukettanaas gooshetti bizayta ashsha.

¹² Neni, «Ta hayssa erikke» giikko, wozina pilggi erizayssi izi akeekennee? Ne shemppo naagizayssi erennee? As ubbaas iza ooso ooso mala immennee?

¹³ Ta naazoo! Lo7o gidida gishshas eessa ma; ililo eessi doonan mal7ees.

¹⁴ Aadho erateththika hessa mala; izi ne shemppos mal7o gididayssa era. Neni izo demmizaa gidikko wonto nees zemppo gidana; ne hidotaykka hada gidenna.

¹⁵ Xillo asa keeth bonqqanaas panga mala zamadoppa; iza keeththa bolla meto gaththofa.

¹⁶ Xillo asi laappunto kundikokka dendees; gido attiin iitati meton dhayeettes.

¹⁷ Ne morkkey kundiza wode ufayettofa; izi dhuphettiza wodekka ne wozinan, «Hashshu!» gooppa.

¹⁸ Ne histtontta aggiko GODAY hessa be7idi ufayettenna; izi ba hanqoza ne morkkeza bollafe zaarana.

¹⁹ Iita asata ooson ceecoppa; istta mala gidarkina gooppa.

²⁰ Iita asas hidotay baawa; iitata xomppey tippi giidi to7ana.

²¹ Ta naazoo! GODAASSINNE kawaas yayya; makkallizaytarakka zuppetoppa.

²² Ays giikko hessa mala asata qoppontta metoy gakkees; kawoppenne GODAAPPE yaana meto oonee erizay?

Aadho Eranchchay Gujji Yootida Hara Leemisota

²³ Aadho eranchchati gujjidikka hayssaththo gida; Pirdishe maado pirday lo7o gidenna.

²⁴ Mooranchcha, «Neni xillo» gizaade derey qanggees; kawoteththatikka iza hileettes.

²⁵ Gido attiin Mooranchcha, «Neni mooradasa» gizayta isttara lo7o miishshi gayttana; isttas keehi daro anjjoy yaana.

²⁶ Suure zaaro imoy doona yeereteththa mala.

²⁷ Kasetada ne karen diza ooso ooththa; ne goshsha giigsa; hessafe guye ne keeth keexxa.

²⁸ Ne shooroza bolla gaasoy baynda markkattofa; ne doonanka cimmofa.

²⁹ Izi taas ooththida mala tani izas ooththana; «Tani izas iza ooso kushe zaarana» gooppa.

³⁰ Tani azalla asa gadera aadhdhadis; akeekay paccida asa woyne tura giddora kanththadis.

³¹ Ubbason agunththi mokkides; gadaa sharafay goozides; gimbeyka laalettides.

³² Tani be7idayssa yuushsha qoppadis; tani beyooysafe timirte demmadis.

³³ Neni, «Guuththara liphiphi gays; guuththara dhiska ekkays; ne kushezakka shiishshada guuththara shempa ekkays» giikko,

³⁴ manqoteththi ne bolla panga mala yaana; paceykka ola miishsha oykkida asa mala puttu gaana.