ሌሚሶ ማጻፋ 23 - Geeshsha Maxaafa

¹ Neni dere haarizayssara kath maanaas uttida wode, ne sinththan de7izayssa lo7eththada akeeka.

² Neni daro yora as gidikko, keehippe naagetta.

³ Izi nena paaccanaas dandayza gishshas, shiiqida mal7o qumas yiiqetoppa.

⁴ Duretana gaada daaburoppa; hayssa mala qofa agganaas akeekanchcha gida.

⁵ Hessa mala dureteththa bolla neni ne ayfe woththiko heera dhayana; qefe kessida golle kafo mala salora paallana.

⁶ Uuze asa kath mooppa; mal7iza iza kath maanaas amottofa.

⁷ Qoodheppe qommon izi nena, «Ma; uya» geesippe attiin iza wozinay nenara de7enna.

⁸ Neni mida guuththa kaththayka nena cooshshana; ne galataykka hada gidana.

⁹ Eeyara haasayoppa; ays giikko ne aadho era haasaya izi kadhana.

¹⁰ Beniisofe diza dhassaa shoddofa. Qasse yi7o nayta gade sugoppa;

¹¹ ays giikko istta ashshiza GODAY mino; izi istta gishshas nenara mootettana.

¹² Ne wozina zores, ne hayththaka erateththa qaalaakko zaara.

¹³ Ne naa seeranaappe guye gooppa; neni qircunchchan shocikko izi hayqqenna.

¹⁴ Neni qircunchchan shoca; iza shemppo hayqoppe ashsha.

¹⁵ Ta naazoo! Ne wozinay aadho eranchcha gidikko ta wozinaykka ufayettees.

¹⁶ Ne inxarsay suure haasayza wode ta wozinay ufayettees.

¹⁷ Nagaranchchata bolla qanaatoppa; gido attiin ubbato GODAAS yashshateth aggofa.

¹⁸ Histtiko nees sinththafe kiyana; ne hidotay hada gidenna.

¹⁹ Ta naazoo! Siya; wozinama gida; ne wozinay suure ogeppe kare kezoppo.

²⁰ Daro woyne ushshu uyizaytaranne asho muussas yaaretizaytara zuppetoppa.

²¹ Ays giikko maththottizaytinne yorati manqana; dhisko daroy carqqa mayzees.

²² Nena yelida aaway yootizayssa siya; ne aayiyakka ceeggida wode kadhoppa.

²³ Tumaa shammafe attiin mulekka bayzoppa; aadho erateth, seeranne akeeka nees miishshe ooththa.

²⁴ Xillo naa aaway keehippe ufayettees; wozinama naa yelida asikka izan ufayettees.

²⁵ Ne aawaynne ne aaya ufayettetto; nena yelidaarakka ufayettu.

²⁶ Ta naazoo! Ne wozina ha taakko zaara; ne ayfeti ta ogeppe kare kezoppetto.

²⁷ Ays giikko layma maccassaya ciimma olla mala; laggeththo machcha xunththa olla mala.

²⁸ Iza panga mala zamada naagawus; ammanettontta addeta dere giddon darsawus.

²⁹ «Woo!» giza waasoy oossee? Ceecey oossee? Ooshshi oossee? Zuuzunththi oossee? Gaasoykka baynda madunththi oossee? Ayfey zo7izay oossee?

³⁰ Woyne ushshu uyishe gam7izaytas gidennee? Walakettida woyne ushshu yuuyi yuuyi ganxizaytas gidennee?

³¹ Woyne ushshi zo7ida wode, iza medhay birille giddon phoolliza wode, duuqqishin cororu gi geliza wode iza tishshi histta xeellofa.

³² Wurseththan izi shooshsha mala dukkees; goppe shooshsha malakka ba yiishsha puukkees.

³³ Ne ayfey beyi eronttaaz beyana; ne wozinaykka elumettana.

³⁴ Neni abbaa giddon diza markabe xeeran ichchida asa mala gidana.

³⁵ Neni, «Istti tana dechchida; gido attiin tani qohettabeekke; istti tana wadhdhida; gido attiin taas erettibeenna. Hara ushsha uyanaas tani awude dendandinaashaa?» gaana.