ሌሚሶ ማጻፋ 22 - Geeshsha Maxaafa

¹ Lo7o sunththi daro dureteththafe aadhdhees; asa matan bonchcheteththika birappenne worqqafe aadhdhees.

² Durenne manqo ubbaa GODAY medhdhides; hessan istta naykka issi gina.

³ Akeekanchcha asi iita be7idi attanaas baqatees; gido attiin akeekay paccida asi meton gelidi qohettees.

⁴ Ashketeththinne GODAAS yashshi, dureteth, bonchchonne de7o immees.

⁵ Iita asa ogen agunththinne yardey dees; gido attiin bana naagiza asi hessafe haakkees.

⁶ Nayi waanidi de7ana bessizaakko tamaarsa; histtiko izi cimmidikka hessafe haakkenna.

⁷ Durey manqo haarees; tal7e ekkidaadey tal7e immidaades aylle gides.

⁸ Iitateth zeriza asi waaye cakkees; iza hanqo guufey dhayana.

⁹ Kiya asi anjjettees; ba qumappeka hiyeesas immees.

¹⁰ Qilcciza as digga; histtiko palamay attana; ooshshinne cashshika dhayana.

¹¹ Wozina geeshshateth dosiza asinne doonappe lo7o haasayza asara kawoy laggetees.

¹² GODAA ayfeti erateth naagettees; gido attiin wordanchchata qaala hada kessees.

¹³ Azalla asi, «Gaammoy karen dees; tana ogen wodhana» gees.

¹⁴ Layma maccassa doonay ciimma olla mala; GODAY hanqettida asi izin wullees.

¹⁵ Naa wozina eeyateththi baqqi oykkees; gido attiin seera shoch izappe haassees.

¹⁶ Baas aqota gujjana giidi hiyeesa naaqqizaynne duresi imota immizay naykka manqana.

Aadho Eranchcha Zore Heedzdzu Tammata

¹⁷ Aadho eranchcha zore wozinappe siya; ne wozinaykka ta timirtekko simmo!

¹⁸ Ays giikko istta ne wozinan woththiko, ne doonanka istta ubbaa haasaykko ne ufayettana.

¹⁹ Ne ammanoy GODAAN gidana mala tani nena hach tamaarsays.

²⁰ Tani neessi zorenne erateth immiza lo7o timirteta xaafabeekkinaa?

²¹ Nena kiittidayssas bessiza zaaro zaarana mala, tani nena tumanne ammanettida qaalata tamaarsana mala gidennee?

²² Hiyeesatasi aykkoyka baynda gishshas istta bonqofa; shilotankka metotanchchata waayisoppa.

²³ Ays giikko GODAY istta gishshas mootettana; istta bonqqidaytakka izi bonqqana.

²⁴ Hanqettiza asara laggetoppa; hanqettanaas eesotiza asarakka zuppetoppa.

²⁵ Neni iza hanoza meezetikko, guyeppe agganawu dandayakka.

²⁶ Waase gelanaas caaqqofa; asa aco qanxxanaas waase geloppa.

²⁷ Neessi qanxxizaazi dhaykko, ne ichchiza algayka attontta ekettana.

²⁸ Ne aawati essida beniisofe diza zawaa shoddofa.

²⁹ Ba ooson loohida as beyadii? Izi kawotas ooththeesippe attiin bessontta asatas ooththenna.