ሌሚሶ ማጻፋ 21 - Geeshsha Maxaafa

¹ Kawo wozinay GODAA kushen dees; izi iza wozinaa goggiza haaththa mala ba dosidaso zaarees.

² Asi biza ogey izaades suure misatees; GODAY gidikko wozinaa pilggi xeellees.

³ Yarshofe bollara xillonne suure pirda GODAY dosees.

⁴ Otoroynne hallacay iita asata bessiza malata; hessika nagara.

⁵ Mino oosanchcha halchchoy duresees; gido attiin bichcharisi manqisees.

⁶ Wordotidi dagasida aqotay dhayza pentta mala; qasseka wodhiza woximade mala.

⁷ Iitati suure ooso dosontta gishshas iitata istta makkallateththi dhayssana.

⁸ Mooranchchati geella ogera hemetteettes; gido attiin geeshshati suure haneettes.

⁹ Duunama machchira daanaappe keeththa daaranchchan aqoy lo7o.

¹⁰ Iitati iita miish ooththanaas keehi amotteettes. Iza laggey izappe qadheta demmenna.

¹¹ Qilccizaadey qaxxayettida wode wozinay paccida asi aadho erateth tamaarees; wozinama asikka tamaardi erateth demmees.

¹² Xillo Xoossay iitatason oosettiza ubbaa caddi xeellees; istta mulera dhayssees.

¹³ Manqo waaso siyanaappe giidi ba hayth tucciko izikka waassiza wode alliza asi dhayana.

¹⁴ Geeman immiza imotay hanqo doshisees; afala giddora immida matta7ey suule hanqo irxxisees.

¹⁵ Suure pirday xillota ufayssees; iita ooththizayta gidikko shirosees.

¹⁶ Akeeka ogeppe kare keziza asi moytille duulatan shemppees.

¹⁷ Hallaca duus daana koyza asi manqees; ushshinne muus gooddiza asi durettenna.

¹⁸ Xillota bolla yida metoy iitata bolla simmana; suure asata bolla yida metoy ammanettonttayta bolla gakkana.

¹⁹ Wocamizanne doonatiza machchira daanaappe bazzon duussi kiya.

²⁰ Wozinama asa soon mal7o qumaynne zaytey dagatti dees; gido attiin eeya asi baas dizayssa, bayndaa ubbaa dippi histti mees.

²¹ Xilloteththinne siiqo kaallizaadey de7o, dureteththinne bonchcho demmees.

²² Wozinama asi wolqqama olanchchati diza katama menththi gelees; istti ammanettida miixatakka laalli yeggees.

²³ Ba doonanne ba inxars naagiza asi bana boshappe naagees.

²⁴ Otoranchchaynne hallaca asi qidhanchcha geetettees; izi otoro hano hanees.

²⁵ Azalla amoy wodhees; ays giikko izi ooththanaas koyenna.

²⁶ Azallay gallas kumeth amottishe pe7ees; xilloy gidikko uuzettontta immees.

²⁷ Iita asa yarshoy harassees; iita qofan shiishshizaa gidikko ay mala iita gidanee?

²⁸ Wordo markkay dhayana; gido attiin tumu markkattizay minnidi de7ana.

²⁹ Iita asi bessonttaz xala xalees; gido attiin suure asi yuushshi qoppees.

³⁰ Asi ba eran, akeekaninne halchchon GODAARA eqettanaas dandayenna.

³¹ Ola gallassas para giigssees; gido attiin xoonoy GODAAPPE yees.