ሌሚሶ ማጻፋ 20 - Geeshsha Maxaafa

¹ Maththosiza ushshi uyizay qilccizaadenne eeya gidees; haytanttan balettida ubbay aadho eranchcha gidenna.

² Kawo hanqoy gaammo xaago mala; iza yiillochchizay ba shemppo bolla pirdees.

³ Palamappe haakoy izaades bonchcho; gido attiin eeya asi ubbay ooshshas eesotees.

⁴ Azalla goshshanchchay wodera goyenna; kath shiishshiza wode shiishshanaas koyees; gido attiin aykkoka demmenna.

⁵ Asa wozina halchchoy ciimma ollan de7iza haaththa mala; gido attiin wozinama asi heeppe duuqqi kessees.

⁶ Daro asati bantta kiyateththa yooteettes; gido attiin ammanettiza as ooni demmanaas dandayzee?

⁷ Xillo asi borey baynda de7o dees; izappe kaallidi iza naytikka anjjettidayta.

⁸ Kawoy pirdanaas ba kawoteththa algan uttiza wode iita ubbaa ba ayfetan harqidi kessees.

⁹ «Ta wozinaa geeshshadis; ta geeshsha; tanan nagaray baawa» gaanay oonee?

¹⁰ GODAY wordo meezaanenne nam7u qommo geeddara miish ixxees.

¹¹ Nay geeshshinne suure gidizayssi izi ooththiza ooson erettees.

¹² Siyiza hayththinne xeelliza ayfe, isttaka GODAY medhdhides.

¹³ Dhisko siiqoppa! Ne histtontta aggiko ne manqana. Minnada ooththa; histtiko neni kath kallana.

¹⁴ Shammiza asi, «Hayssi al7o! Qohees!» gees; gido attiin shammi simmidaappe guyen, «Hiraysson shammadis» giidi ceeqettees.

¹⁵ Eray kumida qaala haasayza metershati worqqafenne zo7o inqqufekka aadho geexe.

¹⁶ Erontta asas waase geliza asa may7o qaari ekkite; hawusha maccassas waase geliza as oykkite.

¹⁷ Wordon demmida kaththi mal7ees; gido attiin aqi pe7idi doonan ace gidees.

¹⁸ Zore ekkada halchcho halchcha; zore ekkontta de7ashe olas booppa.

¹⁹ Zigiranchchay xuura laallees; hessa gishshas lom7ulom7a asappe haakka.

²⁰ Ba aawa woykko ba aayo cayizaades, xomppey sakkanna dhuman to7ana.

²¹ Koyrora eeson beettida aqotas wurseththan anjjoy deenna.

²² Neessi iita ooththida asas, «tani izas halo kessana» gooppa; GODAAN ammanettada naaga; izi nena ashshana.

²³ GODAY wordo meezaanen ufayettenna nam7u qommo geeddara miish ixxees.

²⁴ Asay baanaas bessiza oge GODAY kaaleththees; histtiin asi barkka ba baana oge wostti akeekanaas dandayzee?

²⁵ Issi miish Eesotidi, «Hayssa tani Xoossas immana» giidi adinettidaappe guye zil7eteththi as oykkiza yarde.

²⁶ Aadho erateththi diza kawoy makkallanchchata shaakki erees; izi istta qadhettontta qaxxayees.

²⁷ Asa ayanay GODAA xomppe; hessa gishshas giddo asateth ubbaa izi pilggi xeellees.

²⁸ Kiyateththinne tumateththi kawo naagettees; iza kawoteththa araataykka siiqon minnees.

²⁹ Yelagata wolqqay isttas bonchcho; cimata pulunththi isttas bonchcho.

³⁰ Mino qixaatey iitateth diggees; wadhay iita wozina laammees.