ሌሚሶ ማጻፋ 2 - Geeshsha Maxaafa

Aadho Erateththafe Beettiza Anjjo

¹ Ta naazoo! Neni ta qaala siyikko, ta azazokka neni ne wozinan woththiko,

² ne hayth aadho erateththaako zaarikko, ne wozina akeekakko ne zaarikko,

³ shaakki erisiza erateth ne koykko, ne qaala dhoqqu histtada akeeka xeygikko,

⁴ izokka bira koyza mala ne koykko, qotan diza aqota mala ne izo minththa koykko,

⁵ he wode neni GODAAS yashshateth akeekana; Xoossaaka lo7eththada erana.

⁶ GODAY aadho erateth immiza gishshas izappe erateththinne akeekay beettes.

⁷ Izi suuretas xoono minjjees; istta bolla wosoy bayndaytas gondalle gidees.

⁸ Suure pirda oge naagees; baas ammanettizayta hemeth minththees.

⁹ He wode neni xilloteth, suure pirda, geellay baynda pirdanne lo7o oge ubbaa shaakka erana.

¹⁰ Gaasoykka aadho erateththi ne wozinan gelana; erateththayka ne shemppo ufayssana.

¹¹ Shaakki eroy nees gondalle gidana; akeekaykka nena naagana.

¹² Aadho erateththi nena iita asata ogeppe ashshana; geella haasayzaytappeka nena naagana.

¹³ Istti dhuma ogen baanaas suure oge aggizayta;

¹⁴ Istti iita ooson ufayettizayta; geella ogen hombocizayta.

¹⁵ Istta ogey geella; istta hemetay mirqqeththa.

¹⁶ Aadho erateththi layma maccassafe naagana; ba inxarsan cimmizaarippe nena ashshana.

¹⁷ Iza ba yelagateththa azina aggidaaro; Xoossa sinththan gelida caaqo qaala kadhidaaro.

¹⁸ Izi soo beeththi hayqos gaththees; izi ogetikka moytilleta duulatan gaththeettes.

¹⁹ Izikko gelida oonikka guye simmenna; de7o ogekka demmenna.

²⁰ Hessa gishshas neni lo7o asata leemiso kaalla; xillota ogen hemetta.

²¹ Suure asati biitta bolla gam7ana; wosoy baynda asatikka izi bolla minni daana.

²² Gido attiin iitati biittafe dhayana; ammanettonttaytikka dhoqallettana.