ሌሚሶ ማጻፋ 19 - Geeshsha Maxaafa

¹ Geella yo7o haasayza iita asappe ba de7on borey baynda hiyeesa asi lo7o.

² Erateththi baynda zil7eteththi lo7o gidenna; eeso hemetay oge baleththees.

³ Issi issi asay ba eeyateththan ba de7o moorees; histtidi GODAA bolla yiillotees.

⁴ Dureteththi daro lagge medhdhees; gido attiin manqoteththi kase diza lagge haassees.

⁵ Wordo markkay qaxxayettontta attenna; wordo puukkizaykka qaxxayettontta attenna.

⁶ Daro asay lo7o misatanaas daanna sinththan alaanththees; coo immiza asara asi ubbay dabbotees.

⁷ Manqo iza dabbo ubbay ixxees; histtiin iza laggeti ay keena izappe baqatanee! Kaalli aadashidikka izi istta demmenna.

⁸ Aadho erateth baas miish ooththizay bana siiqees; akeeka siiqizaades injjetees.

⁹ Wordo markkay qaxxayettontta attenna; wordo puukkizaykka dhayana.

¹⁰ Eeyati ishalo duus daanaas bessenna; aylley godaa bolla godatikko hessi ay keena iitaa!

¹¹ Aadho erateththi as dandayanchcha kessees; qoho yedhdhi aadheththi bonchchon gaththees.

¹² Kawo hanqoy gaammo xaago mala; gido attiin iza sinththan saba demoy maata cililissiza ira mala.

¹³ Eeya nay ba aawa bashshas aaththi immees; oosh ehiza machcha ira aaththiza keeththa mala.

¹⁴ Keeththinne aqotay yelidaytappe laatteettes; akeekara diza machcha GODAAPPE beettawus.

¹⁵ Azallateththi deexo dhisko ehees; ooso ooththontta asi gafees.

¹⁶ Azazo naagizay ba shemppo naagees; gido attiin izo ixxizaadey hayqqees.

¹⁷ Manqos kiyiza asi GODAAS tal7ees; GODAY he lo7o ooso waaga qanxxana.

¹⁸ Wodera ne naa seera; izi hayqos bishin co7u ga xeellofa.

¹⁹ Eeson yiillotiza asi qaxxayettanaas bessees; neni agga aadhdhiko hara wodekka nees hessaththo oosoy attenna.

²⁰ Zore siya; seerakka ekka. Histtiko neni wurseththan aadho eranchcha gidana.

²¹ Asa wozinan daro halchchoy dees; gido attiin GODAA qofay polettees.

²² Asappe koyettizay mino siiqo; wordanchcha gidanaappe manqoteththi lo7o.

²³ GODAAS yashshi de7os kaaleththees; hessa mala asi woppan dees; iitaykka iza bochchenna.

²⁴ Azallay ba kushe maaddan yeddees; gido attiin pude ba doonan zaaranawu waayettees.

²⁵ Qilccizaade shocikko wozina pacey akeeka taamarana; akeekanchcha asa seerikko izi erateth demmana.

²⁶ Ba aawa bonqqiza nay, ba aayokka kessi yedeththiza nay izi yeellateththinne kawushshateth ehiza naa.

²⁷ Ta naazoo! Ta zore ne siyontta aggiko, ne eriza qaalaakka balana.

²⁸ Wordo markkay suure pirda bolla qilccees; iita asa doonay iitateth banchikees.

²⁹ Qilccizaytas pirday, eeyata zokkos lissoy giigi uttides.