ሌሚሶ ማጻፋ 18 - Geeshsha Maxaafa

¹ Laggeteth koyontta asi ba amo kaallees; suure pirdaka ubbaa palqqees.

² Eeyay ba qofa qonccisanaaro xalla dosees; gido attiin hara asappe era ekkanaas dosenna.

³ Iitateththi kadhe kaaleththees; yeellateththi yishin kawushshateththi yees.

⁴ Asa doonappe ke7iza haasayay ciimma haaththa mala; aadho erateththa pulttoyka xongettiza piissa haaththaa mala.

⁵ Iita as maaddidi, xilloza pirda geellasizayssi lo7o gidenna.

⁶ Eeya asa doonay iza bolla oosh denththees; iza doonappe ke7iza qaalay iza bolla durqqa xeygees.

⁷ Eeya asa haasayay iza dhayssees; iza metershati izas woximade gideettes.

⁸ Zigiranchcha qaalay mal7o quma mala; asas duge marace gakkees.

⁹ Azalla asi dhayssiza asas isha.

¹⁰ GODAA sunththi mino gimbe mala; xillo asi hee woxxidi iitappe attees.

¹¹ Dureta dureteththi isttas yuushoy gimbettida katama mala; istti bantta dureteththa ke7ettontta adussa gimbe mala qoodettees.

¹² Asi kundanaappe kase iza wozinay otorettees; ashketeththi bonchchofe sinththatees.

¹³ Lo7eththi siyontta dishe zaaroy, izaades eeyateththinne yeella gidees.

¹⁴ Asa ayanay harge dandayana mala maaddees; gido attiin ayanay meqerettichchiko iza ooni dandayanee?

¹⁵ Akeekanchcha wozinay erateth koyees; aadho eranchcha hayththi minththi koyees.

¹⁶ Imotay immizaades oge doyees; iza gita asatarakka erisees.

¹⁷ Baalgaaray yiidi ba qaala immana gakkanaas kasetidi yo7o haasaydaadey xillo misatees.

¹⁸ Saama yessi palama teqqees; nam7u wolqqama baaligaaratakka shaakkees.

¹⁹ Qohettida ishay gimbettida katamappe aadhdhi minnees; iza palamaykka gimbe penge gordiza mino kolata mala.

²⁰ Ba doonan haasaydaazappe asi ba ulo kunththees; ba inxarsafe ke7ida yo7on kallees.

²¹ Inxarsa bolla hayqoynne de7o wolqqay dees; izo dosizayti izi ayfe meettes.

²² Machcho demmida asi lo7o miish demmees; hessaadey GODAAPPE bonchcho ekkees.

²³ Hiyeesa asi aadashidi haasayees; gido attiin durey dhechchi zaarees.

²⁴ Lagge darssiza asi baas meto darsees; gido attiin ishappe aadhdhidi ammanettiza laggey dees.