ሌሚሶ ማጻፋ 17 - Geeshsha Maxaafa

¹ Ooshshi de7izason de7iza gita gibira maanaappe saroynne woppay de7izason ukeththa mela meeththi kiya.

² Akeekanchcha aylles shufuro gidida ba goda naa bolla maatay dees; histtidi ishantta mala isttara issife laattees.

³ Worqqaynne biray taman paacettizayssa mala GODAY asaa wozina pilggi xeellees.

⁴ Iita asi iita haasaya siyees; wordanchchayka genanchcha haasaya ezgees.

⁵ Hiyeesata bolla qilcciza asi istta medhdhidayssa cayees; hara as gakkiza meton ufayettiza asi qaxxayettontta attenna.

⁶ Nayta nayti cimmida asatas kallachcha; yelidayti bantta naytas bonchcho.

⁷ Lo7o haasayay eeyas giigenna; wordo haasayay dere ayssizaades ay mala deexo!

⁸ Matta7ey immizaades bita mala; izi bida soho ubbaan izas injjetana misatees.

⁹ Qohettidi ba qohoza genththiza asi siiqo koyees; gido attiin yo7o zaari zaaridi piqqiza asi ammanettiza laggeta shaakkees.

¹⁰ Eeyay xeetuto lisson shociin erizayssafe akeekay de7iza asi coo seeriin erizayssi aadhdhees.

¹¹ Iita asi makkalla miish xalla koyees; hessa gishshas iza bolla menxe iita asi kiitettana.

¹² Eeya asara iza eeyateththa mala gayttanaappe marata bonqqi ekkichchida maaheyra gayteththi kiya.

¹³ Lo7o ooththidaades iita zaarizaadesoppe iitay mulekka dhayenna.

¹⁴ Oosh doomeththi eele haath pogi yeddo mala; hessa gishshas ooshshi medhettanaappe kasetada kichchaycha.

¹⁵ Wordanchcha xillo xilloza wordo guussi nam7ayka GODAA sinththan ixettida ooso.

¹⁶ Aadho erateththi demmanaas izi koyontta gishshas eeya kushen gelida miish iza ay go7anee?

¹⁷ Laggey ay wodekka lagge; ishaykka meto wodes yelettees.

¹⁸ Akeekay paccida asi baqqi caaqqidi hara asas waase gelees.

¹⁹ Oosh dosiza asi nagara dosees; ubbato bana dhoqqu histtizaadey ba bolla bash xeygees.

²⁰ Geella qofay de7izaades injjetenna; wordo haasayza asikka meton gelees.

²¹ Eeya naa yeloy ceecisees; eeya naa aawaas ufayssi deenna.

²² Ufayettiza wozinay lo7o dhale; gido attiin meqqida wozinay asas wolqqa dhayssees.

²³ Iita asi pirda geellasanaas geeman matta7e ekkees.

²⁴ Akeekay de7iza asi aadho erateth ba sinththafe dhayssenna; gido attiin eeya ayfey sa7a gaxa gakkanaas yuuyees.

²⁵ Eeya nay ba aawa ceecisees; bana yelida aayokka xuuggees.

²⁶ Xillo as qaxxayo bessenna; suure as shocoy lo7o gidenna.

²⁷ Amarda qaala haasayza asi aadho eranchcha; woppa ayanay de7iza asikka akeekanchcha.

²⁸ Eeya asi co7u giikko aadho eranchcha misatees; ba doonakka shiishshi oykkiko akeekanchcha misatees.