ሌሚሶ ማጻፋ 16 - Geeshsha Maxaafa

¹ Asi ba wozinan halchchees; gido attiin zaaroy GODAAPPE beettees.

² Asi biza oge ubbay izas lo7o misatees; GODAY koyro denththa qofaa caddi xeellees.

³ Ne ooththiza ubbaa hadara GODAAS imma; histtiko ne halchchoy polettana.

⁴ GODAY ubbaa miish medhdhida gaasoykka dees; makkallanchchata gidikkoka bashsha gallassas giigsi woththides.

⁵ GODAY otorettiza ubbaa shaatettees; istti qaxxayettontta attettenna.

⁶ Siiqoninne ammaneteththan nagaray atto geetettees; GODAAS yashshateththan asi iitappe haakkees.

⁷ Asa hemetay GODAA ufayssizaaz gidikko iza morkketi izara saro daana mala ooththees.

⁸ Xilloteththan beettiza guuththa miishshi wordora demmiza daro wodheppe aadhdhees.

⁹ Asi ba wozinan ba ooththana miish halchchees; halchchozi GODAY giikko polettees.

¹⁰ Kawo metershati Xoossafe ekkida maatan haasayeettes; iza inxarsi pirda geellasanaas bessenna.

¹¹ Suure geeddaratinne maka miishshati GODAAPPE; karaxiite giddon diza geeddarati ubbay iza oosota.

¹² Kawoti iita ooso harassetteettes; ays giikko kawoteththa araatay xilloteththan eqqees.

¹³ Xillo haasayan kawoti ufayetteettes; tuma haasayzaytakka doseettes.

¹⁴ Kawo hanqoy hayqo kiitanchcha mala; aadho eranchchay gidikko hanqo irxxisees.

¹⁵ Kawoy pashki gishin de7oy dees; izas kiyateththi ira tookkida badhdhesa shaara mala.

¹⁶ Aadho erateththa demoy worqqa demmizayssafe aadhdhees; akeeka demoy bira demoppeka aadhdhees.

¹⁷ Suureta ogey iitatappe haakon dees; ba hemeta naagiza asi ba shemppo naagees.

¹⁸ Otoro geedo bashshi kaallees; hallaca geedokka kundeththi kaallees.

¹⁹ Otoranchchatara zuppetidi di7i ehida miish shaaketti ekkanaappe manqotara manqeteththan duussi kiya.

²⁰ Zore ekkiza asi duretees; GODAAN ammanettiza asi anjjettidaade.

²¹ Wozinan aadho eranchcha gidida asati akeekanchcha geetetteettes; lo7o qaalay erateth gujjees.

²² Baas miish ooththidaades akeekay de7o pultto; dogatas gidikko eeyateththi hanqo ehees.

²³ Aadho eranchcha wozinay iza doona kaaleththees; iza metershatikka erateth gujji gujji beettes.

²⁴ Lo7o qaalay eessa ililo mala mal7ees; bollaka maaddeessinne paththees.

²⁵ Asas suure misatiza ogey dees; gido attiin wurseththan hayqos gaththees.

²⁶ Kaththa koshshi asi minni ooththana mala denththeththees; gafaykka oosos minththeththees.

²⁷ Iita asi iitateth qoppees; iza haasayaykka xuuggiza tama mala.

²⁸ Geella asi oosh denththees; zigirsi ammanettiza laggeta shaakkees.

²⁹ Gene asi ba shooroza cimmees; lo7o gidontta oge iza kaaleththees.

³⁰ Ayfera qim7oti bessiza asi geellateth qoppees; ba mettershaa saxxiza asi iitaso bees.

³¹ Pulunththi bonchcho kallachcha; hessi xilloteththa duussan beettees.

³² Wolqqama as gidanaappe dandaya as gideth lo7o; bana haarizaadey katama wolqqan haarizaadefe aadhdhees.

³³ Asi saama yeggees; gido attiin wurseththa polo immizay GODAA.