ሌሚሶ ማጻፋ 15 - Geeshsha Maxaafa

¹ Liiqo zaaroy hanqo irxxisees; pordolo qaalay gidikko hanqo denththeththees.

² Aadho eranchcha inxarsafe erateththi pulttees; gido attiin dogata doonappe eeyateththi pulttees.

³ GODAA ayfeti ubbaso xeelleettes; iitatanne lo7ota ubbaa lo7eththi be7eettes.

⁴ Shongay de7iza lo7o haasayay de7o miththa mala; gido attiin baleththo haasayay ayana qohees.

⁵ Eeyay ba aawa seera kadhees; gido attiin zore ekkizay ba akeekateththaa qonccisees.

⁶ Xillo asa keeththan daro aqotay dees; gido attiin iitatas geliza miishshi meto ehees.

⁷ Aadho eranchchata doonay erateth zerees; eeyata wozinay gidikko hessa mala deenna.

⁸ GODAY iitata yarsho shaatettees; suureta woosay gidikko iza ufayssees.

⁹ GODAY iita asata oge shaatettees; gido attiin xilloteth kaallizayta dosees.

¹⁰ Suure oge aggidi kare ke7idaade hanqoy naagees; seera ixxiza asi hayqqees.

¹¹ Duufoninne dhayo giddon dizayssi GODAA sinththan qoncce; histtiin asa wozina qofay waani izappe geemmanee?

¹² Qilcciza asi seera dosenna; aadho eranchchatappekka zore oychchenna.

¹³ Wozina ufayssi sinth poo7isees; wozina ceecey gidikko ayana qohees.

¹⁴ Akeekiza wozinay erateth koyees; gido attiin dogata doonay eeyateth banchikees.

¹⁵ Manqota de7oy ubbaa gallassika baaxe. Ufayettiza asati ubbatokka bantta de7on ufayetteettes

¹⁶ Ooshshi dizason diza gita aqotappe GODAA yashshateththara diza guuththa aqotay aadhdhees.

¹⁷ Ooshshi dizason modhdho asho maanaappe siiqoy dizason santh muusi aadhdhees.

¹⁸ Eeson hanqettiza asi oosh kessees; dandayza asi gidikko oosh irxxisees.

¹⁹ Azalla asa ogey agunththan diretti uttides; suure asa ogey gidikko baasa gidees.

²⁰ Aadho erara diza nay ba aawa ufayssees; gido attiin eeya nay ba aayo kadhees.

²¹ Wozina pace asi ba eeyateththan ufayettees; gido attiin akeeki suure oge kaallees.

²² Zorey dhaykko halchchoy ogen attees; daro zoranchchati dizason halchchoy polettees.

²³ Asi bessiza zaaro immidi ufays demmees; koshshiza woden imettida qaalay ay mala lo7oo!

²⁴ Duge duufon woththiza oge bontta mala de7o ogey aadho eranchcha pude kaaleththawus.

²⁵ GODAY otoranchchata keeththa laallees; gido attiin am7ey zawa naagees.

²⁶ GODAY iitata qofa shaatettees; geeshshata qofay gidikko iza ufayssees.

²⁷ Uuze asi baso asa bolla meto ehees; gido attiin matta7e ixxiza asi paxa daana.

²⁸ Xillo asi haasayanaappe kasetidi qoppees; gido attiin iita asa doonappe iita qaalay goggees.

²⁹ GODAY iitatappe haakon dees; gido attiin xillota woosa siyees.

³⁰ Pashka hanoy wozina ufayssees; mishiraachcho qaalay meqeth cililisees.

³¹ De7o immiza seera ekkiza asi aadho eranchchatara issife daana.

³² Seera ixxiza asi bana kadhees; seera ekkiza asi gidikko akeeka demmees.

³³ GODAAS yashshi aadho erateth tamaarssees; bonchchettana koyida asi koyro bana kawushshanaas koshshees.