ሌሚሶ ማጻፋ 13 - Geeshsha Maxaafa

¹ Era nay ba aawa zore wozinappe siyees; qilccizay gidikko seera siyenna.

² Asi ba doonappe ke7iza qaalan lo7o miish demmees; ammanettonttayti gidikko makkallateth amotteettes.

³ Ba doona naagiza asi ba shemppo naagees; doonan yida mala haasayza asi bana dhayssees.

⁴ Azallay keehi amottees shin aykkoka demmenna; minni ooththizayta amoy gidikko kumana.

⁵ Xillo asati wordo haasaya ixxeettes; iita asata haasayay gidikko yeellaseessinne kawushshees.

⁶ Xilloteththi Suure as naagees; iitateththi gidikko nagaranchcha dhayssees.

⁷ Aykkoy baynda bana dure misatissiza asi dees; hara baggara baas daro aqotay dishin manqo misati beettiza asi dees.

⁸ Asi ba dureteththan ba shemppo wozzana gidana; manqoy gidikko hirgay baynda uttees.

⁹ Xillota poo7oy keehi poo7ees; iitata xomppey gidikko to7ana.

¹⁰ Otoroy oosh yelees; aadho erateththi gidikko zore ekkizayta matan dees.

¹¹ Bessontta ogera demmida miishshi dhayi dhayi bees; ba cawa gussidi demmida aqotay dari dari bees.

¹² Hidotay polettontta gam7iko wozinay meqqees; gido attiin amottidayssi polettishin ufayssees.

¹³ Zore kadhiza asi meton gelees; azazo bonchchiza asi gidikko ba waaga ekkana.

¹⁴ Aadho eranchchay immiza timirtey de7o pultto; hessi asi hayqo woximaden gelontta mala naagees.

¹⁵ Akeekay de7iza asi bonchchettees; ammanettontta agoy bashsha oge efees.

¹⁶ Akeekiza asi eran ooththees; eeyay gidikko ba eeyateththa qonccisees.

¹⁷ Iita asi kiitettiko meton gelees; ammanettida asi kiitettiko saroteth ehees.

¹⁸ Seera ixxiza asi manqeessinne kawuyees; hanqo siyiza asi gidikko bonchchettees.

¹⁹ Amoy polettiko keehi ufayssees; eeyati gidikko iitappe haakkanaas koyettenna.

²⁰ Aadho eranchchatara hemettiza asi aadho eranchcha gidees; gido attiin eeyatara hemettiza asi meton gelees.

²¹ Nagaranchchata iita qaaday kaallees; dureteththi gidikko xillotas imettiza woyto.

²² Lo7o asi baas naa nayta gakkanaas laatisees; nagaranchcha aqotay gidikko xillotas dagattees.

²³ Manqo gadey daro kath immana dandayees; gido attiin suure pirday dhaykko pitetti dhayees.

²⁴ Seerontta dichchizay ba naa ixxees; gido attiin seeri dichchizay ba naa dosees.

²⁵ Xilloy kallanaashe gakkanaas mees; iitati gidikko gafida mala daana.