ሌሚሶ ማጻፋ 12 - Geeshsha Maxaafa

¹ Seera dosiza asi erateth dosees; gido attiin seera ixxiza asi damma.

² Lo7o asi GODAAPPE saba demmees; gido attiin GODAY genanchchata pirdees.

³ Asi iitateththan eqqidi minni kanththanawu dandayenna; xilloti gidikko ba dizasoppe qaaxxettenna.

⁴ Wozinama maccassaya ba keeththaawas kallachcha mala; yeellachchiza machcha ba azinaas meqeththa garsan diza woyzazire harge mala.

⁵ Xillota qofay suure; iitata zorey gidikko cimo.

⁶ Iitata haasayay as wodhees; xillota haasayay gidikko as ashshees.

⁷ Iita asati kundana; isttas zereththika attenna; xillota zereththi gidikko minni daana.

⁸ Asi ba aadho erateththa mala galateettes; gido attiin geella qofay de7iza asi kadhettees.

⁹ Aykkoy baynda dishin dure asa mala ceeqettiza asappe bana ziqqi histti baas ooththi aqiza asi kiya.

¹⁰ Xillo asi ba mehes qadhettees; iita asi kiyattees giikkoka menxe iita.

¹¹ Ba biittaa minththi ooththiza asi kath kallees; akeekay paccida asi go7ay baynda hidota gooddees.

¹² Nagaranchchati iitati di7i ehidayssa amotteettes; xillota zereththi gidikko daayana.

¹³ Iita asi ba haasayda iita haasayan oykettees; xilloy gidikko metoppe kessi ekki attees.

¹⁴ Asi ba doonappe ke7iza qaalan lo7o miish kallees; ba ooththida ooso waagakka demmees.

¹⁵ Eeya asas izi biza ogey izas lo7o misatees; aadho eranchchay zore siyees.

¹⁶ Eeya asa hanqoy heerakka erettees; cincca asi gidikko cashshe wudu geenna.

¹⁷ Suure markkay tuma markkattees; wordoy gidikko wordo markkattees.

¹⁸ Akeekontta haasayza haasayay toora mala caddees; aadho eranchcha inxarsi gidikko paththees.

¹⁹ Wordo haasayay guuththa wodessa; tuma haasayay gidikko mernaassa.

²⁰ Iita qoppizayta wozinan baleththoy dees; gido attiin saro miish qoppizayta wozinan ufayssi dees.

²¹ Xillota qohoy gakkenna; iitati gidikko meto kallana.

²² GODAY wordo haasaya harasettees; tumanchchatan gidikko ufayettees.

²³ Akeekara diza asi ba erateth qottees; wozinay baynda asi ba eeyateththaa nashshees.

²⁴ Minni ooththiza asi dere haarees; azallay aylle gidees.

²⁵ Hirgan kumida wozinay as ceecen yeggees; shongara diza haasayay gidikko ufayssees.

²⁶ Xillo asi ba lagge lo7o zore zorees; iitata zorey gidikko tuma ogeppe haassees.

²⁷ Azalla asi shankkatidi ehida ashoza xiixenna; minni ooththiza asi gidikko ba aqotas mishettees.

²⁸ Xilloteththa ogen de7oy dees; he ogen hayqoy deenna.