ሌሚሶ ማጻፋ 11 - Geeshsha Maxaafa

¹ GODAY wordo geeddara ixxees; gido attiin suure geeddaran ufayettees.

² Otoroteththi kawushshateth kaaleththees; ashketeththi gidikko aadho erateth ehees.

³ Xillota istta suureteththi kaaleththees; gido attiin wordanchchata istta wordoteththi dhayssees.

⁴ Hanqo gallas dureteththi go7enna; gido attiin xilloteththi hayqoppe ashshees.

⁵ Borey baynda asata istta xilloteththi isttas oge suurisees; gido attiin iitati bantta iitateththan kundeettes.

⁶ Suureta istta xilloteththi ashshees; gido attiin malteti bantta iita amon oykettana.

⁷ Iita asi hayqqiza wode iza hidotay hada gidees; ba wolqqan izi ceeqettizaazi ubbayka dhayees.

⁸ Xilloy metoppe attees; gido attiin metoy iita asa bolla gakkees.

⁹ Iita asi ba doonan ba laggeza dhayssees; gido attiin xilloti erateththan kessi ekki atteettes.

¹⁰ Xillotas injjetiza wode katamay ufayettees; qasse iitati dhayza wode hashshu gees.

¹¹ Suureta anjjo gaason katamay diccees; iita haasayan gidikko katamay dhayees.

¹² Wozina pace asi ba shooroza kadhees; akeekanchcha asi gidikko ba doona shiishshi ekkees.

¹³ Zigirza asi xuura laallees; ammanettiza asi gidikko xuura naagees.

¹⁴ Kaaleththo pacen kawoteththi kundees; daro zoranchchati de7ikko saroy dees.

¹⁵ Erontta asas waasettizay meton gelees; waase gelanaas caaqqonttaade aykkoyka bochchenna.

¹⁶ Ulo kiya maccassaya bonchchettawus; wolqqaththiza asati dureteth xalla duretteettes.

¹⁷ Kiya asi bana go7ees; menxe iita asi gidikko ba bolla meto ehees.

¹⁸ Iita asi demmiza wodhey deenna; xilloteth zeriza asi gidikko suure woyto ekkana.

¹⁹ Xilloy de7o demmana; gido attiin iitateth kaalliza asi hayqqana.

²⁰ GODAY iita qofay de7iza asata shaatettees; gido attiin suure hemettizaytan ufayettees.

²¹ Iita asi qaxxayettontta attenna; gido attiin xilloti qaxxayettettenna.

²² Akeekay paccida maccassa puulateththi guddunththa siidhen aaththida worqqa mala.

²³ Xillota amos wurseththi lo7o xalla; gido attiin iitata amos wurseththi hanqo xalla.

²⁴ Issi issi asati coo kiyateth immeettes; gido attiin isttas aqoy haa haa darees. Baggati keehi uuzetteettes; gido attiin istti manqi manqi beettes.

²⁵ Kiya asi durettana; haratas immizay baas woppa demmees.

²⁶ Geemara kath dagasizaade derey qanggees; kessi bayzizaadey gidikko anjjettees.

²⁷ Lo7o miish minththi koyzaade lo7o miishshi naagees; gido attiin iita miish koyzaade iita miishshi gakkees.

²⁸ Ba dureteththan ammanettiza asi kundana; xilloti gidikko lo7o miththa mala cililana.

²⁹ Soo asaa bolla shiro denththiza asi go7ay baynda attana; Eeyatikka aadho eranchchatas aylle gidana.

³⁰ Xillo asi de7o ayfe ayfiza miththa mala; shemppota ashshizay aadho eranchcha.

³¹ Xilloti sa7an bantta ooso waaga ekkizaa gidikko, iitatinne nagaranchchati bantta oosos ekkana waagay waani darandeeshaa!