ሌሚሶ ማጻፋ 10 - Geeshsha Maxaafa

Solomoone Leemisota

¹ Hayti Solomoone leemisota. Aadho erateththi diza nay ba aawa ufayssees; gido attiin eeya nay ba aayo ceecisees.

² Bessontta ogera yida aqotay go7enna; gido attiin xilloteththi hayqoppe ashshees.

³ GODAY xillota gafisenna; gido attiin nagaranchchata amo calqamissana.

⁴ Azallateththi manqisees; minni oosoy gidikko duresees.

⁵ Aadho eranchchay kath wodera shiishshees; kath shiishshiza wode dhiskiza asi gidikko kawuyees.

⁶ Xillo asi anjjettees; iita asa doona makkallateththi gordees.

⁷ Xillota sunththay anjjon xeygettishe daana; iitata sunththi gidikko dogettana.

⁸ Aadho eranchchay azazo ero gi ekkees; lom7ulom7iza eeyati gidikko bashshaso beettes.

⁹ Suure asi hirgay baynda dees; geella oge biza asi gidikko ba mooron oykettana.

¹⁰ Gene oosos qim7otiza asi meto ehees; lom7ulom7iza eeyaykka meto ehees.

¹¹ Xillota haasayay de7o pultto; iitata haasayay gidikko makkallateth genththees.

¹² Ixoy palama denththeththees; siiqoy gidikko bala ubbaa kammi aadhdhees.

¹³ Wozinama asay aadho eran haasayees; eeya zokkon gidikko xam7ay meqqees.

¹⁴ Aadho eranchchati erateth dagaseettes; eeya haasayay gidikko bash xeygees.

¹⁵ Dureta aqotay isttas gimbettida katama; manqota manqoteththi isttas dhayoso.

¹⁶ Xillo asa damozay de7o; iita asatas wodhey gidikko qixaate.

¹⁷ Seera ekkiza asi de7o ogen hemettees; seera ixxiza asi gidikko meto bolla wodhdhees.

¹⁸ Ixxishe ba ixxizayssa qottiza asi wordanchcha; zigirs zigirza asi gidikko eeya.

¹⁹ Daro haasaya giddon mooroy dhayenna; ba doona shiishshi ekkiza asi gidikko aadho eranchcha.

²⁰ Xillota haasayati geeshsha bira mala; iita asa qofas gidikko go7ay deenna.

²¹ Xillota haasayay darota go7ees; eeyati gidikko ba wozina pacen hayqqeettes.

²² GODAA anjjoy dure kessees; izi he dureteththan meto gujjenna.

²³ Eeya asi iita ooson ufayeettes; wozinama asi gidikko aadho erateththan ufayeettes.

²⁴ Iita as hirgiza miish iza bolla gakkana; gido attiin xillo amoy izas polettana.

²⁵ Gote carkoy dendishin iitati pitetti dhayana; xilloti gidikko mernaas minni daana.

²⁶ Caalay ach zil7issiza malanne cuway ayfe qohiza mala azalla asi kiittidaadenttas hessa mala.

²⁷ GODAAS yashshi layth adussees; iitata barey gidikko qaanththa.

²⁸ Xillota hidotay ufayssan gaththees; iitata hidotay gidikko hada gidi attees.

²⁹ GODAA ogey xillotas baqati attizasoho; iita ooththizaytas gidikko bashsha soho.

³⁰ Xilloti mulekka dhoqallettettenna; iitati gidikko biitta bolla de7ettenna.

³¹ Xillota doonay aadho erateth haasayees; geellata inxarsi gidikko qanxxettana.

³² Xillota metershay bessiza yo7o haasayees; iita doonay gidikko bokka yootees.