ሌሚሶ ማጻፋ 1 - Geeshsha Maxaafa

Leemisota Wostti Go7ettanaakko Bessiza Oge

¹ Hayti Isra7eele Kawo Dawite naa Solomoone leemisota.

² Leemisoti asay aadho erateththa, seeranne erateththa haasaya akeekanaas maaddeettes.

³ Isttika de7ana de7on aadho erateth, xilloteth, suure pirdanne suure hano tamaarsizayta.

⁴ Erateththi paccidaytas akeeka, naateththatas erateththinne wozinamateth immizayta.

⁵ Aadho eranchchati ha leemisota siyidi erateth gujjeettes; akeekanchcha asatikka lo7o zoreta ekkeettes.

⁶ Hessa malan leemisotanne istta birsheththata, aadho eranchchata haasayanne istta maaleththo akeekanaas dandayeettes.

⁷ Aadho erateththas koyroy GODAAS yashshateththa; eeyati gidikko aadho erateththinne seera kadheettes.

Yelaga Naytas Imettida Zore

⁸ Ta naazoo! Ne aawa zore ezga; ne aaya tamaarsizayssaka aggofa.

⁹ Hessi ne hu7es bonchcho kallachcha; nees qoodhen aaththiza alleqo mala gidana.

¹⁰ Ta naazoo! Nena nagaranchchati baleththiko eeno gooppa.

¹¹ Istti nena, «Ane haa ya; issife biidi suuth gussanaas zuggoos; xillotakka wodhanaas qotetti uttoos.

¹² Duufoy mittiza mala nunikka ane istta paxa dishin mittoos; nuni istta ciimma ollan olettiza asa mala ane ooththoos.

¹³ Nuni al7o miish ubbaa demmana; histtidi nu keeththa bonqqi ekkida miishshan kunththana.

¹⁴ Nunara zuppeta; demmidaaz issife go7ettana» gaana.

¹⁵ Ta naazoo! Isttara issife oge hemettofa; istti biza oge baana gaada ne toho denththofa.

¹⁶ Gaasoykka istti iita miish ooththanaas woxxeettes; asaa suuth gussanaaskka jaameettes.

¹⁷ Kafoy xeellishin iza oykkanaas yarde woththiko aykkoka maaddenna.

¹⁸ Hayti ha asati bantta suuth gussanaas zuggeettes; bantta shemppo wodhanaas qotetti utteettes.

¹⁹ Bessontta ogera go7a demmanaas woxxiza ubbata wurseththay hayssa mala; istti shiishshida aqotay istta shemppo ekki baana.

Aadho Erateth Kadhizaytas Imettida Seera

²⁰ Aadho erateththaya oge bolla de7ashe xeygawus; dubbushan ba qaala dhoqqu histtada waassawus.

²¹ Aadho erateththaya cora asi shiiqizason waassawus; katama geliza pengen eqqada,

²² «Intteno wozina pacetoo! Intte awude gakkanaas eeyateththa oge kaallanee? Qilccizaytoo! Intte qilccizayssan awude gakkanaas ufayetteetii? Eeyatoo! Erateththa awude gakkanaas ixxanee?

²³ Ta seeran intte simmidaakko, tani ta qofa inttes qonccisanakkoshin; ta qaalakka inttena tamaarsanakkoshin.

²⁴ Tani xeygida wode intte koyontta ixxideta; tani ta kusheza micciin oonikka wudu gibeenna.

²⁵ Ta zore ubbaa kadhideta; ta seerakka ekkibeekketa.

²⁶ Hessa gishshas inttena metoy gakkiza wode tani intte bolla miiccana; bashshi intte bolla gakkiza wode tani intte bolla qilccana.

²⁷ Bashshi abba dambala mala inttena qaaththiza wode, metoy gote carko mala inttena denththiza wode, tuggaynne waayey inttena mittiza wode tani inttena qilccana.

²⁸ «He wode istti tana xeygana; ta gidikko isttas koykke; istti tana minththi koyana; gido attiin tana demmettenna.

²⁹ Istti erateth ixxida; GODAAS yashshateth dooribeettenna.

³⁰ Ta zore ekkanaas koyibeettenna; ta seera ubbaa kadhida.

³¹ Hessa gishshas istti bantti ooththida ooso ayfeza maana; bantti qoppida qofa ayfekka kallana.

³² Wozinay paccidayta aadho erateththafe haakoy istta wodhana; balata wuda dhayoy istta dhayssana.

³³ Gido attiin tana siyizayti ubbay saron daana; aykko hirgay baynda woppan daana» gawus.