ኣብዲዩ ቲንቢቴ 1 - Geeshsha Maxaafa

Nabe Abdiyuy Beyida Ajjuuta

¹ Abdiyuy be7ida ajjuuta; GODAY Eedoome gishshas Abdiyu kiittides; nu siyida Xoossa kiitay, «Tani Xoossay Eedoome bolla meto gaththana mala azazada deraa giddo as kiittadis» gees.

² GODAY Eedoomes, «Ta nena dere asaappe laafisana; neni as ubbaan leqettidaaz gidana.

³ Nenoo zaalla gomppan dizayssoo! Ne duussaso dhoqqasohon keexxidayssoo! ‹Ta dizasoppe tana ziqqaso woththana dandayzay oonee?› gizayssoo! Ne wozina otoroteththi nena baleththides.

⁴ Ne golle kafo mala keeha pude piradhdhikokka, ne keeth xoolintte giddon keexxikokka ta nena heeppe haa duge woththana.

⁵ «Kaysoti woykko bonqqizayti omars yiikko baas gidizayssa ekkeettes; Kath maxizayti piixe ashsheettes; gido attiin ne morkketi issinokka ashshettenna.

⁶ Intteno Eesawe zereththatoo! Intte keeth bonqqettides; hekko intte haaroy wuri bogettides.

⁷ Nenara caaqettida laggeti nena baleththida; nena dosiza laggeti ne bolla morkketeththan dendida; ne kath midayti nees yarde woththidi nena ne dereppe gooddida; gido attiin istti hessa ne bolla ooththishin neni erabeekka.

⁸ «He wode Eedoomeppe aadho eranchchata, Eesawe zumaappe erateth dhayssana.

⁹ Eedoome deren de7iza asati wurikka hayqqana; Temaane oliza wolqqama olanchchati babbana.

Xoossay Eedoome Qaxxayiza Gaaso

¹⁰ «Ne isha Yaaqoobe zereththata neni gene wodhida gishshas ne kawuyada mernaas dhayana.

¹¹ Yerusalaame morkketi penge menththidi haarida miish ubbaa bonqqiza wode neni lanqera eqqa xeelladasa; hessa gishshas Yerusalaame bolla saama yeggi gishetti ekkidaytappe neni dummatakka.

¹² Yuhuda deren de7iza ishata bolla gakkida meton neni ufayettana koshshennashin ufayettadasa; qasse istta dhayoninne meton ufayettananne otorettana nees bessennashin otorettadasa.

¹³ Ta derey dhayza gallas istta pengera neni gelana bessennashin; istti dhayza gallas metotishin neni ufayettana bessennashin; qasseka istti dhayza gallas ne istta haaro boggana nees bessennashin.

¹⁴ Goodettidi qotettidayta wodhana ne oyddu oge bolla naagana bessennashin naagadasa; qasse attida asata meto gallas ne aaththa immanaas bessennashin immadasa.

¹⁵ «Ta Xoossay asa ubbaa bolla pirdiza wodey gakkida gishshas Eedoomee! Ne ooththida iita oosoy ne bolla simmana; hessa gishshas ne ooso mala ne ekkana.

¹⁶ Anjjettida ta zuma bolla intte waaye ushshu uyida mala intte yuushon diza hankko derey waaye ushshu uyana; uyidayti wurikka dhayana.

Isra7eele Dere Xoono

¹⁷ «Xiyoone zuman metoppe attanay daana; he zumayakka geesh gidana; Yaaqoobe derey bonqqettida ba haaro zaari ekkana.

¹⁸ Yaaqoobe zereththati tama mala, Yooseefe zereththati tama laco mala gidiin Eesawe zereththati uttula mala gidana; tamay uttula miza mala Yaaqoobe zereththatinne Yooseefe zereththati Eesawe zereththata dhayssana.

¹⁹ «Yuhuda dereppe dugeha baggara diza Negebe asay Eedoome biitta laattana; arshey wulliza baggara gadhan diza asati Filisxeeme, Efreemenne Samaariya biitta laattana; qasse Biniyaame zereththati Gala7aade biitta laattana.

²⁰ Beti bida Isra7eele asay Alahe geetettiza dereppe simmidi Kanaane biittafe Sirafta gakkanaas diza biitta laattana; bete biidi Sirafta deren diza Isra7eele asay Negeben diza katamata laattana.

²¹ Attida Isra7eele asati Xiyoone zumaa bolla uttidi Eedoome dere ayssana; qasse kawoteththayka Xoossas gidana» gi yootides.