ታይቦ ማጻፋ 24 - Geeshsha Maxaafa

¹ Balaameykka GODAY Isra7eele asaa anjjanaas dosidayssa erida wode kase izi ooththizayssa mala muurenno ooso ooththanaas koyibeenna; ba sinththaaka duge bazzo zaarides.

² Isra7eele asay ba qommon qommon maarara dunkaani uttidayssa be7ides; Xoossa Ayanay iza bolla wodhdhides;

³ histtiin izi tinbite haasaya doommidi, «Bi7oore naa Balaamey haasayza tinbite qaalay, iza ayfetikka doyettidaadey,

⁴ Xoossa qaala siyizaadey izi kundi dishin iza ayfeti doyettiin Ubbaa Dandayza Xoossa ajjuuta be7izaade kiitay hayssa.

⁵ Yaaqoobe ne dunkaaneti Isra7eele ne dizasoti ay mala lo7oo?

⁶ Isttika micettida zulleta mala; qasseka shaafa doonan diza atakiltesohota mala; GODAY tokkida godare uuththa mala; woykko shaafa doonan diza Libaanoose ziga mala.

⁷ Iray ubba wode isttas bukkiza gishshas istta haaththi kumi palahees; zereththa wode isttas gidiza haaththi dees; istta kawoy Agaageppe aadheth gidana; istta kawoteththi dhoqqu dhoqqu gaana.

⁸ Istta Gibxeppe kessida Xoossi isttas menththa mala olettana; istta morkke gidida kawoteththata izi puuzereththi yeggana; izi istta meqeththata liiqisana; istta wondafetakka menththereththi yeggana.

⁹ Hayssi kawoteththay gaammo mala zamadi uttides; macca gaammo malakka zuggi uttides; istti zamadi uttidasohoppe istta denththana dandayzay oonee? Nena anjjizaadey anjjetto; nena qanggizaadeyka qanggetto» gides.

¹⁰ Balaaqey hanqon ba kushe baqqidi Balaames, «Tani nena ta morkketa qangganaas xeygadis; gido attiin neni istta heedzdzuto anjjadasa.

¹¹ Ha7i gidikko eeson gede neso ba! Ta nees daro miish immana ga qaala geladis; gido attiin ne he miishshaa demmontta mala Xoossi gordides» gides.

¹² Balaamey Balaaqes zaaridi, «Neni taakko kiittida asatas,

¹³ ‹Balaaqey baas diza biranne worqqa ubbaa izi taas immizaakkoka tani ta shenen iita gidiin woykko lo7o ooththanaas GODAA qaalappe aadhdhanaas dandaykke; tani yootanay GODAY taas yootooro xalla› gaada kase ta isttas yootabeekkinaa?» gides.

Balaamey Yootida Oydanththo Tinbite

¹⁴ Wurseththan Balaamey Balaaqes, «Ha7i tani gede ta dere simma bays; gido attiin ta baanaappe kasetada Isra7eele asay ne dere asaa bolla gaththanayssa nees qonccisanaas koyays» gides.

¹⁵ Hessafe guye izas tinbite yooto doommidi, «Iza ayfey doyettidaadey, Bi7oore naa Balaamey yootiza tinbite qaalay hayssa;

¹⁶ Xoossa qaala siyizaade, izi kundi dishin iza ayfeti doyettiin Wolqqama Xoossafe erateth demmidaade, Ubbaa Dandayza Xoossaa ajjuuta be7izaade kiitay hayssa.

¹⁷ Tani iza be7ays; gido attiin ha7i gidenna; ta iza xeellays; gidikkoka ha7i matan gidenna; Xoolinttey Yaaqoobeppe beettana; Kawoteththa guufey Isra7eeleppe kezana; Mo7aabe zereththaanne Seete zereththata ubbaa dippi histti dhayssana.

¹⁸ Eedoomey xoonettana; iza morkke Seyreykka izas haarettana; Isra7eele derey xoonoy xoonoshin daana.

¹⁹ Yaaqoobeppe dere ayssizaadey kezana; izi katama giddon attidayta pitti dhayssana» gides.

Wurseththan Balaamey Haasayda Haasaya

²⁰ Hessafe guye Balaamey gede Amaaleeqe zaari xeellidi, «Amaaleeqey ubbaafe aadhdhiza wolqqama kawoteth; gido attiin izi wurseththan mernaas dhayana» gi tinbite yootides.

²¹ Gede Qenaawe dere asaakko simmi xeellidi, «Ne duussasoy ammanettidaso misatikkoka, Ne keeththay zaallafe woocetti keexettidaa gidikkoka,

²² Intteno Qenaawe deretoo! Asoorey inttena xoonidi di7i efiza wode intte wuri wurana» gi tinbite yootides.

²³ Wurseththan Balaamey, «Xoossi hayssa ooththishin oonee shemppora paxa daanay?

²⁴ Olas worajjiza asay markabera Qophirooseppe yaana; isttika Asoorenne Eboore dhayssana; isttika ba hu7es mernaas dhayana» gi tinbite yootides.

²⁵ Hessafe guye Balaamey dendidi gede ba dere bides; Balaaqeyka baso simmides.