ታይቦ ማጻፋ 1 - Geeshsha Maxaafa

Isra7eele Asaas Koyro Qoodeteth

¹ Isra7eele asay Gibxeppe kezida nam7anththo layththan nam7anththa aginay doommida koyro gallas istti Siina bazzon dishin GODAY Gaytoteththa Dunkaane giddon Musera gayttidi,

² «Attumasaa issaa issaa sunththan sunththan xaafada Isra7eele asaa qommon qommoninne zarkken zarkken qooda.

³ Neninne Aarooney isttas layththay nam7u tammunne izappe bollara diza oletti dandayana attumasata istta maaran maaran qoodite.

⁴ Dumma dumma zarkketappe istta kaaleththiza isttas aawatiza korapinneti inttenara gidetto.

⁵ Inttena maaddanayta sunththi hayssafe kaalli dizayta, Oroobeele zarkkefe Shaadure naa Elxuure,

⁶ Simoona zarkkefe Xurshadaye naa Salum7eele,

⁷ Yuhuda zarkkefe Aminadaabe naa Ne7asoone,

⁸ Yisakoore zarkkefe Xu7aare naa Natina7eele,

⁹ Zaabiloone zarkkefe Heloone naa Elyaabe,

¹⁰ Yooseefe naytappe Efreeme qommoti Amihuude naa Elshama Minaase naytappe Pedaxuure naa Gamal7eele,

¹¹ Biniyaame zarkkefe Gidi7oone naa Abidaane

¹² Daane zarkkefe Amishadaye naa Ahi7ezeere,

¹³ Aaseere zarkkefe Okra naa Fagu7eele,

¹⁴ Gaade zarkkefe Da7u7eele naa Elyaasaafe,

¹⁵ Niftaaleme zarkkefe Enaane naa Ahire» gi yootides.

¹⁶ Maabaraa garsafe zarkkefe zarkkefe Isra7eele asaa kaaleththanaas doorettida korapinneti haytantta.

¹⁷ Museynne Aarooney hayta bantta sunththan xaafettidayta ekkida.

¹⁸ Nam7anththo aginay doommida koyro gallas maabaraza kumeth issi bolla shiishshidi zarkken zarkkeninne dabbon dabbon shiishshidaappe guye dereza qoodida; yelettiin layththay nam7u tammu kumidaytanne hessafekka bollara gidida attumasaa istta sunththan sunththan mazgabi qoodida.

¹⁹ Hessaththoka Musey GODAY azazida mala Siina bazzon dereza qoodides.

²⁰ Ola olettanaas dandayzayta layththay nam7u tammaanne hessafekka bollara dizayti bantta zarkkefe zarkkefe qoodettida; addeta qooday hayssafe kaallizayssa;

²¹ Oroobeele zarkkefe 46,500,

^22-23 Simoona zarkkefe 59,300,

^24-25 Gaade zarkkefe 45,650

^26-27 Yuhuda zarkkefe 74,600,

^28-29 Yisakoore zarkkefe 54,400,

^30-31 Zaabiloone zarkkefe 57,400,

^32-33 Yooseefe naa Efreeme zarkkefe 40,500,

^34-35 Yooseefe naa Minaase zarkkefe 32,200,

^36-37 Biniyaame zarkkefe 35,400,

^38-39 Daane zarkkefe 62,700,

^40-41 Aaseere zarkkefe 41,500,

^42-43 Niftaaleme zarkkefe 53,400.

⁴⁴ Musey, Aarooneynne tammanne nam7u Isra7eele zarkketa korapinneti qoodida attuma asay haytantta;

⁴⁵ olas baana dandayza addeti ubbay isttas layththay nam7u tammanne hessafekka bollara dizayti ba zarkken zarkken qoodettida.

⁴⁶ Heyta qooday issi bolla 603,550 gidides.

⁴⁷ Gido attiin hankko zarkketara Lewe zarkketi qoodettibeettenna.

⁴⁸ Kase GODAY Muses,

⁴⁹ «Ne Isra7eele attuma asaa qoodashe Lewe zarkketa isttara gaththa qoodoppa.

⁵⁰ Lewe zarkketi gidikko Gaytoteththa Dunkaanenne iza giddon go7ettiza miishshaa bolla alaafeteth imma; istti Dunkaanezanne iza giddon go7ettiza miishshata ubbaa tookketto; dunkaana giddon ooththetto; iza yuushon dunkaani uttetto.

⁵¹ Intte kase dunkaani dizasoppe dendi biza wode Lewe zarkketi xalala Dunkaaneza shoddi laallidi istti shempiza ooraththason isttaka tokketto; isttafe attiin dunkaanaakko shiiqiza ay asikka hayqon qaxxayetto.

⁵² Hankko attida Isra7eele asay ba butten butteninne ba diza gutan gutan ba bandira bandira tokketto.

⁵³ Gido attiin ay asikka dunkaanaakko shiiqidi tana hanqeththidi Isra7eele deraa dhaysisontta mala Lewe zarkketi he Dunkaaneza yuushon dunkaanidi naagetto» gides.

⁵⁴ Hessa gishshas Isra7eele asay GODAY Muse azazida mala ubbaaka ooththida.