ናሂሚያ ማጻፋ 9 - Geeshsha Maxaafa

Isra7eele Asay Ba Nagara Paaxeth

¹ He aginan nam7u tammanne oydanththo gallas Isra7eele asay issi bolla shiiqidi ba nagara gishshas keehi modhettidayssanne ceecidayssa qonccisiinaas maaqa may7idi ba hu7e bolla gudulla laallidi xoomides.

² Isra7eele asay allaga asaa ubbaafe bana shaakkides; hessafe guye asay wuri dendi eqqidi isttinne kase istta aawati ooththida nagara ubbaa paaxida.

³ Heen istti eqqida mala dishin istta Xoossa woga maxaafay heedzdzu saate kumeth isttas nababettides; qasse hara heedzdzu saate kumeth istti ba nagara paaxishe GODAAS ba Xoossaas hokki goynnida.

⁴ Lewe baggataska eqqiza madirakey dees; he madirakeza bolla Iyaasoy, Baaney, Qadim7eeley, Shebaaniyay, Buuney, Sherebiyay, Baneynne Kanaaney eqqidi ba qaala dhoqqu histtidi GODAA bantta Xoossako woossida.

⁵ Iyaaso, Qadim7eele, Baane, Hashabinaye, Sherebiya, Hoddiya, Shebaaniyanne Pattaya geetettiza Lewe bagga asati, «Intte dendi eqqidi mernaa GODAA intte Xoossaa galatite; galatappenne anjjofe dhoqqu dhoqqu gida bonchchettida Xoossa sunththa sabbite» gida.

Maarettana Woossida Woosa

⁶ Hessafe guye Isra7eele asay, «Xoossoo, ne xalla Goda; Salonne salo bolla dizayta, sa7anne sa7a bolla dizayta, gita abbanne iza giddon dizayta ubbaa medhdhiday nena. Ubbaas de7o shemppo immadasa; Salo medheteththati ubbay nees goynneettes.

⁷ GODAWU, neni Xoossa! Neni Abraame Uure geetettiza Kaladaawe dereppe doorada xeyga kessadasa; iza sunththaaka Abrahaame gadasa.

⁸ Izi nees ammanettida as gididayssa beyada izara caaqettadasa; Kanaane asay, Hiite asay, Amoore asay, Paarize asay, Yaabuse asaynne Gergese asay izan diza biitta, iza zereththatas duussa biitta gidana mala laatissanaas caaqo qaala geladasa; neni xillo gidida gishshas ne caaqo qaala minththa naagadasa.

⁹ «Neni nu aawata bolla kase Gibxe biittan gakkida waayeza beyadasa; istti Zo7o abba matan dishe maado koyidi nena woossida woosaa siyadasa.

¹⁰ Gibxe kawo bolla, shuumeta bollanne he biittan diza asaa kumeththa bolla gita malaatata qonccisa bessadasa. Hessa ne ooththiday kase nu aawata Gibxe asay ay mala isttas menxe iitidi waayisidaakko ne be7ida gishshassa; ne hessa ooththoyssa gaason hach gakkanaas ne sunththay bonchchon xeygettana mala ooththadasa.

¹¹ Istta sinththan abbaa nam7u kessa shaakkada, mela biittarakka istta pinththadasa; Shuch duge ciimma haaththa giddon yeggiza mala istta gooddizayta ciimma haaththa giddo yeggadasa.

¹² Gallas tuussa mala eqqida shaaran, omarsi tuussa mala taman poo7isada istti baanaas bessiza ogera baana mala kaaleththadasa.

¹³ «Saloppe duge Siina zuma bolla wodhdhada ne dereza haasayssadasa; lo7o wogatanne suure timirteta ne isttas immadasa.

¹⁴ Geeshsha ne Sambata istti bonchchana mala tamaarsadasa; Ne azazota, wogatanne maarata ne oosanchcha Muse baggara isttas immadasa.

¹⁵ Istti gafettida wode saloppe kath immadasa; istti saamettida wode haath zaallafe isttas pulttisadasa; qasse ne isttas immana gaada caaqqida biittaa gelidi ekkana mala azazadasa.

¹⁶ «Kase nu aawati otoranchchanne wozina muume gidida gishshas ne azazo naagibeettenna;

¹⁷ Nees azazettibeettenna; ne isttas ooththida gita malaataakka ubbaa dogida; wozina muume gidida; qasse guye Gibxe aylleteththan zaarana mala banttana kaaleththiza as doorida. Gido attiin neni siiqon kumida Xoossa, hanqos takkiza Xoossa, atto giza Xoossa, kiyanne maariza Godaa gidida gishshas ne istta aggabeekka.

¹⁸ Mara leemison baas eeqa xoos ooththidi, ‹Gibxe biittafe nuna kaaleththidi kessida Xoossi hayssako!› gida. Ne sunththaaka ay mala mooro mooridoo!

¹⁹ «Ne maarotay gita gidida gishshas istti heen bazzo biittan dhayi attana mala aggabeekka; gido attiin istti gallas tuussa mala shaaran omars tuussa mala taman istti baanaas bessiza ogera istta kaaleththo aggabeekka.

²⁰ Lo7o gidida ne Ayana istta tamaarsana mala immadasa; isttas maana mala manna, uyana mala haath immadasa.

²¹ Oyddu tammu layth kumeth istta bazzo biittan maaddada isttas koshshiza miishshe issinokka diggabeekka; istti may7ida may7oy wuribeenna; qasse istta tohoykka puuribeenna.

²² «Istta deraa yuuyi aadhdhi diza deretanne istti kawoteththata ubbaa xoonidi he biitta ekkana mala ooththadasa; hessa gishshas kawo Sihooney ayssiza Haseboone geetettiza biittanne kawo Aagey ayssiza Baasaane geetettiza biitta xoonidi laattida.

²³ Isttas qooday salo xoolintte mala darida nayta immadasa; kase istta aawatas ne immana ga qaala gelida biittaa istti xooni laattana mala ooththadasa.

²⁴ Istta nayti Kanaane biitta xooni laattida; he biittan diza asata neni xoonadasa; istta kawota bollanne Kanaane biittan diza asaa bolla ba dosida mala ooththana mala wolqqa immadasa.

²⁵ Qasse lo7i gimbettida katamatanne aradda biitta, lo7o miish isttan kumida keeththata, haaththa ollatanne woyne atakiltey tokettiza gade, wogara miththatanne daro ayfe ayfiza miththata laattida; Miidinne uyidi modhdhida; neni ne kiyateththan immida lo7o miishshan wuri ufayettida.

²⁶ «Gido attiin istti ne bolla makkallida; ‹Ne qaalaska azazettoko› gida; ne wogaa siyokko giidi nees zokko zaarida; qasse istti neekko zaarana giidi seeri tamaarsida nabeta wodhida; ubba wode ne bolla cashsha qaala haasayda.

²⁷ Hessa gishshas istta morkketi istta xoonidi haarana mala aaththa immadasa; morkketikka istta metoththida; istti banttana metida wode neekko waassida; nekka istta waasaa salon daada siyadasa; ne maaroteththa gitateththaafe dendidayssan istta morkketappe ashshana kaaleththizayta yeddadasa.

²⁸ «Gido attiin saro demmida wode qasseka simmi nagara ooththida; hessa gishshas ne istta morkketas aaththa immadasa; istta morkketikka istta haarida; gido attiin ne maaddana mala giidi neekko simmi woossida wode salon dashe istta woosaa siyadasa; neni ne qadheteththafe dendidayssan istta ubba wode maaddadasa.

²⁹ Ne qaalaakko simmana mala neni istta seeradasa; gido attiin ba otoroteththafe dendidayssan ne azazota kadhida; istti azazettidaakko isttas de7o immiza ne wogata bolla nagara ooththida. Istta wozinay muumida gishshas ba sinth haraso zaarida; qasse ba wozina muumisidi ne azazota ixxida.

³⁰ Daro layth ne istta dandayadasa; istta tamaarsana mala nabeta ne Ayanan isttas denththadasa; gido attiin istti lo7eththi siyibeettenna; hessa gishshas istta dere matan diza asati xoonana mala istta aaththa immadasa.

³¹ Gido attiin ne maaroteththa gitateththaafe dendidayssan istta aggabeekka; Ne kiyanne atto giza Xoossaa gidida gishshas istta dhayssabeekka.

³² Gita, wolqqamanne yashshiza nu Xoossawu! Neni ne caaqo qaalanne mernaa gakkanawu diza ne siiqo naagaasa; nu bolla, nu kawota bollanne nuna kaaleththizayta bolla nu qeeseta bollanne nu nabeta bolla nu aawata bolla, qasseka dere ubbaa bolla, Asoore kawotappe doommidi hach gakkanaas gakkida meto ubbaa ne qoppa.

³³ Ne nuna qaxxayana gaada ne ooththidayssi wuri likke; nuni nagara ooththikokka neni ne ammaneteththan minna eqqadasa.

³⁴ Kase nu aawatinne nu kawoti, nuna kaaleththizaytinne nu qeeseti ne wogaa naagibeettenna; qasse ne isttas immida azazotanne seera zore siyibeettenna.

³⁵ Ne istta kawoteththan isttas gita anjjo immadasa; araddanne aaho biitta isttas immadasa; gido attiin istti ba nagarappe simmidi nees goynnibeettenna.

³⁶ Hessafe dendidayssan ne nu aawati ayfeyo maana malanne lo7o miishshan ufayettana mala ne isttas immida biittan hach nu aylle gididos.

³⁷ Nuni nagara ooththida gaason neni nu bolla kawoththida kawoti nu biitta anjjo ubbaa istti go7etteettes; qasse nu bollanne nu meheta bolla ba koyida mala ooththeettes; hessafe dendidayssan nuni ha7i gita waaye bolla doos.

Asay Qachchida Qaala Pirman Qoncciseth

³⁸ «Hanida yo7o ubbaas nuni Isra7eele asay qaalan gaaggidayssa xaafi woththanaas qaala qachchidos; nu qachchiin xaafettida qaala bolla nuna kaaleththizayti, Lewe baggatinne nu qeeseti ba maatame shocida» gida.