ናሆሜ ቲንቢቴ 2 - Geeshsha Maxaafa

Nannawe Kundeth

¹ Hanne Nannawe! Nena qohanay ne bolla yides; ne miixa naaga; ne oge xomosa; minththa gixxa; ne wolqqa ubbaa minththa.

² Dhayssizayti istta mela ashshikokka, istti woyne atakilte tokkizasoho mulera dhayssikoka Isra7eele bonchcho ubbaa mala GODAY Yaaqoobe bonchchoka zaarana.

³ Iza wottadarata gondalley zo7o; iza olanchchatikka zo7o may7o may7ida; istti olettanaas giigettida gallas istta para-gaareta biratay xolqees; istta toora toomay luuxxees.

⁴ Para-gaareti demban yaanne haa buraqeettes; ogeta bollaka shom7ushom7u geettes; laciza xomppe misateettes; wolqqanththa mala wawaci geettes.

⁵ Doorettida olanchchata xeygees; gido attiin istti yishe ogen dhuphetteettes; katamaa gimbeko woxeettes; ola teqqiza gondalleyka heen dees.

⁶ Shaafa pengey waggi gi doyettides; kawoteththa keeththi kundides.

⁷ Nannawey kawuyiin izi kawoya di7ettada buussi attonttayssi kaseti yootettides. Izi macca aylleti haraphphe mala yeekkana; bantta tirakka iccana.

⁸ Nannawey eele haaththa mala; izi haaththika miccana. «Eqqa! Eqqa!» gi istti waassana; gido attiin guye simmizay deenna.

⁹ Iza minjja keeththan dagattida aqotas qooday deenna; biidi biraakka, worqqaaka bonqqi ekkite.

¹⁰ Qocirettadus; bonqqettadus; kallottadus; wozinay taahides; gulbatey kokkorides; ashoy qaaxxides; ayfesoykka gilqides.

¹¹ Gaammoti kase de7iza gongoloy, istta marati mizasoy, macca gaammoynne adde gaammoy bizasohoy, istta marati hirgay baynda mizasoy ha7i awan dizee?

¹² Gaammoy ba maratas gidanayssa keena wodhides; maccataska cuulli wodhides; ba wodhidayssa ba shemppizason, ba bonqqi shiishshidayssa ba gongolo kunththides.

¹³ Ubbaafe Wolqqama GODAY, «Ta intte bolla dendadis; intte para-gaaretakka xuuggana; intte gaammo marata mashshay maana; inttes maana miishshika biitta bolla ashke; intte kiittizayta cenggurssi hayssafe guye seetettenna» gi awajjees.