ናሆሜ ቲንቢቴ 1 - Geeshsha Maxaafa

¹ Elqoshe dere as Nahomey Nannawe dhayo gishshas yootida ajjuuta maxaafay hayssafe kaallizayssa.

Nannawe Bolla Qonccida Xoossa Hanqo

² GODAY zil7ettizanne halo kessiza Xoossa; GODAY halo kessizanne hanqon kumida Xoossa. GODAY halo kessizaadenne pala miishshi izan kumidaade. GODAY ba baalgaarata bolla halo kessees; ba morkketa bolla ba hanqo ehees.

³ GODAY hanqettanaas eesotenna; iza wolqqayka gita. GODAY mooranchcha qaxxayontta aggenna; gote carkoynne abba dambalay izas oge; shaaray iza toho gudulla.

⁴ Abba seeridi melissees; Shaafata ubbaa micinchchees. Baasaaneynne Qarmeloosey shullida. Libaanoose ciishshatikka qoqofettida.

⁵ Zumati iza sinththan kokkorida; zumbullatikka seerida. Iza sinththan biittay, alameynne izin diza ubbati qaaxxida.

⁶ Iza hanqora eqettana dandayzay oonee? iza hanqo minoza tookkana dandayzay oonee? Iza hanqoy tama mala eexxides; zaallatikka iza sinththafe za7ida.

⁷ GODAY lo7o; meto gallassika qotetti attizaso. Izan ammanettizayta naagees.

⁸ Gido attiin izi Nannawe wolqqama di7o haaththan dhayssana; ba morkketa dhumay dizaso yedeththana.

⁹ Istti Xoossa bolla ay duulatikkoka izi istta dhayssana. Metoy nam7anththo dendenna.

¹⁰ Istti agunththan qaxettana; ba woyne ushshan istti maththottana; tamay istta buuxa mala maana.

¹¹ Hanne Nannawe! GODAA bolla iita duulatizaytinne iita zore zorettizayti ne garsafe beettida;

¹² GODAY, «Istti ay wolqqamatanne darota gidikkoka istti qanxxetti dhayana. Haysso Yuhuda neni hayssafe kase ta nena un7eththidaa gidikko hayssafe guye ta nena un7eththike.

¹³ Ha7ikka ta istta qambara ne morgefe menththa diggana; ne izan qashettida sansalatakka duuththa yeggana» gees.

¹⁴ Hanne Nannawe GODAY nena, «Hayssafe sinththan ne sunth xeygiza yeletay deenna. Ne eeqa xoossata keeththan diza masetti giigida misletanne seerisi giigsida eeqa xoossata dhayssana; ne iita gidida gishshas ne moogettanaaso ta bookkana» gees.

¹⁵ Hekko mishiraachcho yootizayssi, saroteth awajjizayssi zumaa bollara yuussan dees. Yuhuda ne ba7aaleta bonchcha; ne adinettidayssa gaththa; hayssafe guye iitati ne dere worajjettenna; istti mulera dhayana.