ሚኪያሳ ቲንቢቴ 5 - Geeshsha Maxaafa

Beeteliheemeppe Haarizaadey Yaanayssas Imettida Hidota Qaala

¹ Hanne neni ola asata katamaye, ne ola asaa ziirsa. Nuna oykkanaas yuuyi aadhdhida; Isra7eele haarizayssas shagalan guufera shocana.

² Hanne ne qasse Beeteliheeme Efraata, Yuhuda zarkketappe neni guuth gidikkoka izas kessay kase beni wodeppe gidida Isra7eele haarizaadey ne giddofe taas kezana.

³ Hessa gishshas yelizaara miixattada yelana gakkanaas Isra7eeley yegetta attana; hankko attida ishatikka simmidi Isra7eele asara walakettana.

⁴ GODAA wolqqan GODAA ba Xoossa sunththa gitateththan minni eqqananne ba mehe izi heemmana; he wode iza wolqqateththay biitta gaxa gakkana gishshas asay giiga duus daana.

⁵ Isttas saroteththi iza gidana. GODAY Isra7eele Asaa Ashshananne Istta Morkketa Dhayssana Asoore asay nu biitta worajjishin nu miixataka menththi gelishin laappun heemmizayta hessafekka osppun halaqata nu iza bolla denththana.

⁶ Asoore derey mashshan Namuruude derey koohoppe shodettida giththa mashshan haarettana; Asoore asay nu biitta worajjishininne nu dhas bochchishin izi nuna ashshana.

⁷ Yaaqoobe zereththafe attidayti daro dere giddon Xoossa achchafe wodhdhiza ira mala maata bolla loddara puusishe biitta kaaleththiza puuse ira mala asappe aykkoka koyontta asa gidana.

⁸ Wora do7ata giddon diza gaammoy, ba tohora icci menththereththishe biza mala, menththereththoyssaka izappe oonikka woththi ekkanaas dandayonttayssa mala; Daro dorsa giddon diza wodalla gaammo mala; Yaaqoobe zereththafe attidayti hankko dereta giddoninne daro asa giddon hessa mala gidana.

⁹ Ne kushey ne morkketa xoonidi dhoqqu dhoqqu gaana; ne morkketi wurikka dhayana.

¹⁰ He wode Xoossi, «Ta intte giddofe intte parata dhayssana; para-gaaretakka mulera dhayssana.

¹¹ Intte biittan diza katamatakka dhayssana; intte miixataka ubbaa laallana.

¹² Intte marotizayssaka dhayssana; hessafe guye marotekketa.

¹³ Masetti kezida intte eeqa misletanne intte eeqasohotakka ta intte giddofe dhayssana; hayssafe guye intte intte kushen ooththidaytas goynneketa.

¹⁴ Asheero geetettiza eeqiza misleyo ta intte giddofe shoddana; ta intte katamaakka dhayssana.

¹⁵ Taas azazettontta dereta wolqqama hanqon ta halo kessana» gees.