ሚኪያሳ ቲንቢቴ 3 - Geeshsha Maxaafa

Iita oge Kaaleththizaytanne Wordo Nabeta Bolla Xoossa Hanqo

¹ Qasseka, «Intteno Yaaqoobe kaaleththizaytanne Isra7eele keeththa asaa haarizaytoo siyite; intte tumu pirda eranaas inttes bessennee?

² Intte lo7o ixxideta; iita qasse dosideta; ta asaa galba shooqideta; istta ashokka meqeththafe shaakkideta.

³ Ta asaa asho mideta; galbaaka shooqideta; istta meqeththika menththereththideta; asho caaciza bashen caaciza malanne distten doyssiza asho mala qanxxereththideta» ta gadis.

⁴ Isttika pude Xoossako waassana shin Xoossi istta waaso siyenna; iitateththaa gishshas he wode Xoossay ba ayfeso isttafe haraso zaarana.

⁵ Xoossi, «Ta dere baleththiza nabeti asi istta mizikko, ‹Saroteththi dees› geettes. Muzontta aggiko qasse, ‹Olay yees› gi awajjanaas dendeteettes.

⁶ Hessa gishshas istta bolla qammay beettontta, dhumay erontta gakki wodhdhana; nabeta bolla arshey gelananne gallassay isttas qammana.

⁷ Buro marotizayti kawuyana; tinbite yootizayti yeellatana; wurikka ba ayfeso kammana; gaasoykka isttas zaaroy Xoossa achchafe baynda gishshassa» gides.

⁸ Ta qasse Yaaqoobes iza qohoza, Isra7eelesikka iza nagara yootanaas wolqqan, Xoossa ayanan, tuma pirdaninne minoteththan kumadis.

⁹ Intteno Yaaqoobe soo asa kaaleththizaytoo! Intteno Isra7eele dere haarizaytoo! Tumu pirda kadhizaytoo! Tumu gididaaz ubbaa mirqqizaytoo! Ane siyite.

¹⁰ Xiyoone, asa suuth gussoninne Yerusalaame iitateththan kunththizayto! Ane siyite.

¹¹ Kaaleththizayti matta7es pirdeettes; qeeseti miishsha gishshas tamaarseettes; Nabetikka miishshe mida gishshas yooteettes. Hessa ubbaa ooththidikka, «Xoossi nu giddon dees gidennee? Ay iitaykka nu bolla gakkenna» gishe Xoossan ceeqeteettes.

¹² Hessa gishshas intte geedon Xiyooney goshsha biitta mala goyettana; Yerusalaameykka qolettida keeththa doore gidana; Xoossa Keeththay diza zumaykka sharafa maatay iza bolla diccida zuma gidana.