ሉቃሳ ሚሺራቾ 1 - Geeshsha Maxaafa

¹ Bonchcho Tofiloosaa! Nu achchan hanida yo7ota gishshas daro asati baas hanida mala xaafida.

² He taarikezikka koyroppe denththidi ba ayfera be7ida markkatinne Xoossa qaala yootidayti nuus aaththidayssa.

³ Tanikka ta baggara xaphoppe denththada keeha naagettadanne paacca xeellada taarikeza wursa sinththe xaafettanaas bessizayssa sinththasada kaallidi xaafettanaas bessizayssa kaaleththada naagettada nees xaafana mala taas lo7o gidi beettides.

⁴ Hayssa ubbaa ta ooththizay ne tamaardayssi tuma gididayssa nena ero guussassa.

Xammaqiza Yohannisi Yelettanayssa Kiitanchcha Gabreeley Kasetidi Yootida Qaala

^5-6 Herdoosi Yuhuda biittan kawotida wode Abiya geetettiza qeeseta halaqaza baggafe qeeseteththa ooso taray iza gakkida Zakaraasa geetettiza issi qeesey dees. Iza machcheyakka Elsabeexo geetettawus; izakka Aaroone bagga asa. Nam7atikka Godaa azazonne iza wogaa wosoy baynda naagidi dizaytanne Xoossa sinththan xillo asa.

⁷ Gido attiin Elsabeexa naa yelontta maynne gidida gishshas isttas nay baa; nam7atikka wodey bida asa.

⁸ Zakaraasi Xoossa sinththan qeeseteththa ooso taray iza gakkiin izi ooththishin

⁹ qeesetas diza wogaa mala Xoossa Keeththan gelidi exaane cuwasana mala exay iza gakkides.

¹⁰ Exaaney cuwattishin asay wurikka karen diidi woossees.

¹¹ Godaa kiitanchchay exaaney cuwattiza sooppe ushachcha baggara eqqidi Zakaraasas beettides.

¹² Zakaraasikka iza be7idi keehi dagammidi babbides.

¹³ Kiitanchchay Zakaraasas, «Babbofa! Ne woosay seetettides; ne machcheya Elsabeexa nees attuma naa yelana; iza sunththaaka ne Yohannisa gaada sunththana.

¹⁴ Iza yeletan neni daro ufayettana; Daro asaykka ufayettana.

¹⁵ Godaa sinththan izi gita gidana. Woyneppe oosettida cajje gidiinkka hara maththosiza ushshu gidiinkka izi uyenna; izi buro ba aayey qanththan dishe Xillo Ayanan kumana.

¹⁶ Isra7eele asaappe darota istta Xoossako zaarana.

¹⁷ Aawata wozina istta naytakko, azazettonttaytakka gede Xillota cinccateththaako zaarana malanne Godaas bessiza dere giigsana mala Eelaasa Ayananinne iza wolqqan Godaappe sinththara izi baana» gides.

¹⁸ Zakaraasi kiitanchchazas, «Tani cima; ta machcheyakka cimmadus; tani hayssa aazan eranee?» giidi oychchides.

¹⁹ Kiitanchchazikka zaaridi, «Tani Xoossa sinththan eqqiza Gabreele. Tanikka ha Mishiraachchoza nees gaththanaas kiitettada yadis.

²⁰ Hekko neni ba woden polettana ta qaala ammanontta ixxida gishshas ne doonay duudana; nenikka haasayana dandayakka» gides.

²¹ He wode derey Zakaraasi, «Xoossa Keeththaafe kezontta aazas gam7idaakko» giidi modhettishe naagides.

²² Izi Xoossa Keeththaafe kezidi asa haasayssanaas dandaybeenna; malati malati besoppe attiin haasayanaas dandayontta aggiin asay izi Xoossa Keeththan Xoossafe ooraththa miish be7idayssa erides.

²³ Zakaraasikka ba ooso taray polettidaappe guye baso simmides.

²⁴ Hessafe guye iza machcheya Elsabeexa naa qanththatadus, ichchashanththo aginay gakkanaas asi bana be7ontta mala qotettadus.

²⁵ Izakka, «Goday ba maarotan ta leqettidayssa asaa giddofe digganaas ha wodezan hayssa taas ooththides» gadus.

Yesusi Yelettanayssa Gabreeley Kaseti Yootides

²⁶ Elsabeexa qanththatida usuppunththa aginan, Xoossi ba kiitanchcha Gabreele, Galila biittan diza Naazirete geetettiza katama yeddides.

²⁷ Izikka kawo Dawite zereth gidida Yooseefe geetettiza asas giiga uttida Maaramo geetettiza geela7oykko kiitettides.

²⁸ Yiidinne iza dizaso gelidi, «Hanne Xoossi nena anjjidaare saro! Xoossi Goday nenara dees nenikka anjjettidaaro» gides.

²⁹ Maarama kiitanchchaa haasayan keeha dagammada, «Hayssi ay giza sarokaa?» gaada yo7oza keeha qoppadus.

³⁰ Kiitanchchayka Maaramo, «Xoossi nenan ufayettiza gishshas babbofa!

³¹ Neni qanththatana; attuma naakka yelana; sunththaaka Yesusa gaada sunththana.

³² Izikka gita gidana; ubbaafe bolla gidida Xoossa naa geetettana; Godaa Xoossi iza aawaa Dawite kawoteththaa izas immana.

³³ Izi Isra7eele nayta bollan mernaas kawotana; iza Kawoteththaskka wurseththi deenna» gides.

³⁴ Maaramakka kiitanchchaas, «Tani adde gelabeekke shin hayssi waani hananee?» gaada oychchadus.

³⁵ Kiitanchchayka Maaramis, «Xillo Ayanay ne bolla wodhdhana; ubbaafe bolla Xoossa wolqqay ne bolla kuwasana; hessa gishshas yelettana naazi Geeshsha Xoossa naa geetettana.

³⁶ Asi yelukku; iza maynne giidi haasayza ne dabboya Elsabeexa cimateththan attuma naa qanththatada yelanaas usuppunththo agina oykkadus.

³⁷ Xoossas hanontta miishshi deenna» gides.

³⁸ Maaramakka zaarada, «Hekko tani Xoossa aylle diikkinaa; ne gida mala taas hano» giin kiitanchchay izippe shaakettidi bides. Maarama Elsabeexo beyana badus.

³⁹ Maaramakka he wode matara eesota dendada pude gezze deren diza issi Yuhuda katama badus.

⁴⁰ Zakaraasa keeththe gelada Elsabeexo sarotadus.

⁴¹ Elsabeexa Maarami sarokaa siyida mala qanththan diza naazi izi qanththan guppides, Elsabeexinkka Xillo Ayanay kumides.

⁴² Izakka ba qaala dhoqqu histtada, «Maccassa ubbaafe ne anjjettidaaro; Ne qanththan diza naazikka anjjettidayssa.

⁴³ Ta Godaa aaya taakko yaada tana oychchanaas tani oonee?

⁴⁴ Ne saroka qaala ta siyida mala ta ulo giddon diza nay ufayssan guppides.

⁴⁵ Polettana giidi Goday izis yootidayssa ammanidaara iza anjjettidaaro» gadus.

Maarami Galata Woosa

^46-49 Maaramakka, «Izi ba aylley kawushshateththaa xeellida gishshas ta shemppiya Godaa dhoqqu ooththada bonchchawus. Ta Ayanaykka tana ashshiza ta Xoossaan ufayettawus. Wolqqama Goday taas gita miishshe ooththida gishshas hachchife sinththan asi wuri tana anjjettidaaro gaana. Iza sunththayka geeshsha.

⁵⁰ Iza maaroy izas babbizaytas naa naa gakkanaas daana.

⁵¹ Ba wolqqan daro mino ooso ooththides; ba wozina qofan otorettizayta laallides.

⁵² Kawota kawoteththafe woththides, ashketa qasse dhoqqu dhoqqu histtides.

⁵³ Gafidayta lo7o miishshan kalssides; dureta gidikko mela kushe yeddides.

^54-55 Kase nu aawatas Abrahaamessinne iza qommotas gida hidota qaala naaganaas ba maareteththaa yuushshi qoppidi ba aylle Isra7eele maaddides» gadus.

⁵⁶ Maaramakka Elsabeexi achchan heedzdzu agina sire gam7ada baso simmadus.

Xammaqiza Yohannisa Yeleteth

⁵⁷ Elsabeexis yelo gallassay gakkiin attuma naa yeladus.

⁵⁸ Izi gutatinne dabbotikka Goday izis gita maareteth ooththidayssa siyidi izira issife ufayettida.

⁵⁹ Yelettida osppunththa gallas qaxxaras yida. Iza aawaa sunththan Zakaraasa giidi sunththana koyida.

⁶⁰ Gido attiin aayeya, «Hanenna; iza sunththi Yohannisa geetetto» gadus.

⁶¹ Isttika izis, «Ne dabbotappe Yohannisa geetettidi xeygettida asi oonikka baa» gida.

⁶² Aaway Zakaraasi Naaza oona giidi sunththana koyidaakko malatan oychchida.

⁶³ Zakaraasikka xaafiza miish izas immana mala oychchi ekkidi sunththay, «Yohannisa» gi xaafiin asay wurikka malalettides.

⁶⁴ Heerakka Zakaraasa doonay pogettidi inxarsi birshettiin Xoossaa galata oykkides.

⁶⁵ Iza gutati wuri daro babbida. Hayssi wurikka dhoqqa gezze biittan Yuhuda deren, ubbason haasayettides.

⁶⁶ Hayssaka siyida asi wurikka, «Ha guuththa nay ay hananeeshaa?» giidi hanoza wursika ba wozinan oykkides; Godaa kushey tumappe izara issife dees.

Zakaraasi Yootida Tinbite

⁶⁷ Naaza aaway Zakaraasi Xillo Ayanan kumidi tinbite haasayshe,

⁶⁸ «Yiidi ba asaa ashshida gishshas Isra7eele Xoossi galatetto.

^69-70 Beni wode ba geeshsha nabeta doonan haasayettidayssa mala ba aylle Dawite keeththan ashshiza wolqqa nuus denththides.

⁷¹ Izi nuna nu morkketappenne, nuna ixxizayta kusheppe ashshees.

⁷² Hayssa izi ooththiday nu aawatas ba maaroteth bessanaassa, ba geeshsha caaqoza yuushshi qoppanaassa.

^73-75 Kase nu aawaa Abrahaames caaqqidayssa qoppana malanne nu morkketa kusheppe izi nuna kessiin nuni izas baboy baynda ooththanaassinne nu diza wode ubbaan ba sinththan nuna geeshshateththaninne xilloteththan essanaassa.

⁷⁶ Godaa oge giigsanaas ne izappe sinththara biza gishshas ta naazoo neni wogga Xoossaa nabe geetettana.

⁷⁷ Asay ba nagarappe maarettida gishshas deres atoteththa erateth ne immana mala,

⁷⁸ nu Xoossaa lo7o maaroteththaafe dendidayssan Saloppe nuus arshey kezides.

⁷⁹ Hessika dhuman dizaytassinne hayqo kuwa giddon dizaytaska poo7isana malanne nu tohotakka saroteththa oge kaaleththanaassa» gides.

⁸⁰ Guuththa naazikka diccides; Ayanankka minnides; Isra7eele asaas qonccen beettana gakkanaas bazzo biittan de7ides.