ኤርማሳ ዚላስ 5 - Geeshsha Maxaafa

Maarettanaas Woossida Woosa

¹ Abeet GODAWU! Nu bolla gakkidayssa ne qoppa; nu kawushshateththaka xeella.

² Nu biitta allagati laattida; nu keeththaaka baas duussaso ooththida.

³ Nuni yi7o gididos; nu aayeti am7eta gidida.

⁴ Nuni nu haaththa miishshan shammi uyidos; nuni nu miththaaka shammi ekkidos.

⁵ Nuna gooddizayti nuus geedon eqqida; keehippe daaburdos; shempoka digettidos.

⁶ Nuni kath kallanaas giidi Asoore asatassinne Gibxes kushe immidos.

⁷ Nu aawati nagara ooththida; nuni istta qixaate ekkidos.

⁸ Aylleti nuna haarida; istta kusheppe nuna kessi ekkanay oonikka deenna.

⁹ Bazzon diza ola gaason nuni nu shemppo aaththi immidi kath demmidos.

¹⁰ Kosha daroppe dendidayssan hargidos; nu medhaykka shaala mala gidides.

¹¹ Maccassata Xiyoonen tunisida; geela7otakka Yuhuda katamatan wolqqan oykki kawushshida.

¹² Daannata istti kaqqida; cimatakka bonchchibeettenna.

¹³ Yelaga attuma nayti woxan gaaccana mala wolqqaththida; panththati deexo mith tookkidi gadigadida.

¹⁴ Cimati pirdanaas uttiza dubbusha aggida; panththatikka bantta mazamure aggida.

¹⁵ Ufayssi nu wozinappe dhaydes; nu durissika yeehon laamettides.

¹⁶ Kallachchay nu hu7eppe kundides; nu nagara ooththida gishshas aayye ana!

¹⁷ Hessa gaason nu wozinay daaburdes; nu ayfeykka baljumides.

¹⁸ Xiyoone biittay bula gidida gishshas worakanati guppizasoho gidides.

¹⁹ Abeet GODAWU! Neni mernaas haaraasa; ne kawoteththay yeletappe yeleta gakkanaas daana.

²⁰ Ne nuna ays ubba wode co7u gay? qasse ays hayssa gakkanaas aggaagadii?

²¹ GODAWU! Neni nuna neekko zaara; nunikka neekko simmana! beni nu bonchchoza zaarada nuna ooraththa!

²² Ne hessaththo ooththontta aggiko nuna mulera aggadii? ne hanqozaska zaway baawee?