ኤርማሳ ዚላስ 4 - Geeshsha Maxaafa

Yerusalaame Bolla Gakkida Qixaate

¹ Worqqay waani tasides; Walakay baynda muuruta worqqay waani laamettidee! Xoossa keeththi keexettida bonchcho shuchchati oge doonan laalettida.

² Kase bonchchettida worqqa misatiza Xiyoone nayti ha7i waanidi kushen urqqafe tilidi medhdhida mana miishsha mala gididoo!

³ Worakanati ba marata dichchanaas ba dhanth dhanththeettes; ta derey gidikko bazzon diza yanchcha kafota mala menxe iitides.

⁴ Daro saamettida gishshas guuththa nayta inxarsi pude gonggiraththara oykettides; nayti kath woossida shin oonikka isttas immibeenna.

⁵ Kase lo7o kath mizayti ha7i metotidi oge bolla toylattida; kase lo7o may7o may7idi ishalon diccidayti ha7i bidinththan ichchida.

⁶ Ta dereza bolla gakkida qixaatey oona kusheykka bochchontta dishin eeson aadhdha wodhdhida Sodoome katama asaa gakkida qixaatezappeka keehi iita.

⁷ Istta kaaleththizayti shachchafe aadhdhida geeshsha; maaththafe aadhdhi booththa; istta bollay zo7o inqqufe aadhdhida aarissa; qasse isttas medhaykka simpere geetettiza shuchcha mala.

⁸ Ha7i gidikko istta medhay shaalapeka aadhdhi karettides; oonikka istta ogen be7idi erenna; istti meqeth xalla attida; mela miththa mala gidida.

⁹ Koshan hayqqidaytappe mashshan hayqqidayti lo7o;

¹⁰ Ta asaa bolla gakkida hanqo gaason naytas mishettiza aayeti ba yelida nayta ba kushera doysi mida.

¹¹ Xoossi ba wolqqama hanqoza qonccisides; Xiyoono dippi histti dhayssiza tama oyseththides.

¹² Biitta bolla diza kawotappe woykko alame bolla diza asaappe oonikka istta morkketi woykko worajjizayti Yerusalaame pengeta menththi gelana giidi oonikka qoppibeenna.

¹³ Hayssi haniday nabetinne qeeseti ooththida nagara gaasonna; qasse istti xillota suuth gussida gishshassa.

¹⁴ Qooqe asa mala istti oge bolla gadigadana; istti suuththan tunida gishshas istta may7o bochchanaas xalizaadey deenna.

¹⁵ Hessa gishshas asay istta bolla, «Kichchite! Intte tuna! Haakkite! Nuna bochchofte!» gi waassana. Hessa gaason istti baqatidi kawoteththaa giddon toylattishe asay isttas, «Intte nunara hayssan daanaas dandayekketa» gida.

¹⁶ Istta laalliday Xoossa; hayssafe guye izi isttas qoppenna; istta qeesetas bonchchoy imettenna; cimataska puulay deenna.

¹⁷ Nu ayfey maado demmanaas xeellishe coo mela daaburdes; nuna ashshanaas dandayontta deretappe maado demmanaas laamotan naagidos.

¹⁸ Asay nu geedon eqqiza gishshas nu ogera hemettanaas dandaybeekko; nuus wurseththi matides; nu layththi wurides; nu dhayza wodey gakkides.

¹⁹ Nuna gooddizayti salora paalliza gollefe aadhdhi eesoteettes; istti nuna zuma bollara gooddida; bazzon nuna zuggi naagida.

²⁰ Nuni iza kuwa garsan utti de7ana gi qoppidayssa, Xoossi tiydayssa, nuus de7o shemppoka gididayssa bantta woximaden oykkida.

²¹ Intteno Uuxe biittan diza Eedoome asatoo! Ufays nococu giite! Gido attiin qaaday inttenakka gakkana; intte maththottananne kallo attana.

²² Intteno Xiyoone asatoo! Intte mooro gaason qaxxayettoyssi inttes gidana; hayssafe guye inttena di7ettida biittan gam7isenna; gido attiin Eedoome asatoo! Izi inttena intte nagara gishshas qaxxayana; izi intte moorozakka qoncce kessana.