ኤርማሳ ዚላስ 3 - Geeshsha Maxaafa

Maareteththan Beettiza Hidota

¹ Godaa hanqo guufen waaye be7ida asi tana.

² Izi tana ba sinththafe kessi yeddides; poo7oy baynda gede dhuman tana gelththides.

³ Izi kumeththa gallas zaari zaaridi tana shocides.

⁴ Izi ta asateththaaka ceegissides; ta meqeththatakka menththereththides.

⁵ Izi tana metoninne iita tugga giddo yeggides.

⁶ Hayqqidi gam7ida asa mala tani dhuman daana mala ooththides.

⁷ Ta kezontta mala ta yuushoza dirdes; mino sansalatan tana qachchides.

⁸ Tani maado koyada waassa xeygiinkka izi ta waasaa siyanaas koyibeenna.

⁹ Ta ogeza masettida shuchchan gordides; ta aadhdha biza ogezakka geellasides.

¹⁰ Izi taas zamadi uttida zardo mala gidides; qasseka qotetti naagiza gaammo mala gidides.

¹¹ Tana ta biza ogeppe goochchi kessidi duusereththi yeggides; tana asi bayndason olaagides.

¹² Izi ba wondafe dafi oykkides; tana caddanaas ba yiish giigsi woththides.

¹³ Izi yiishshaa yeddidi taas wozina ayfen caddides.

¹⁴ Tani ta dere asaas qidhe miish gidadis; gallas kumeth ta bolla qidhe mazamure yexxeettes.

¹⁵ Izi ta de7oza camon kunththides; izi tana ciye ushshu kalssides.

¹⁶ Izi ta ach shuchchan menththides; izi tana gudullan yedhettides.

¹⁷ Ta shemppoys saroteththi dhaydes; ufayssi izi aazakkonne ta baladis.

¹⁸ Hessa gishshas, «Ta bonchchoy taappe shaakettides; tani Xoossafe naagiza hidota ubbay dhaydes» gadis.

¹⁹ Ta waayenne ta toylateththaa ta qoppishin ta de7oy tana cammides.

²⁰ Ubbaa wodekka ta hayssa qoppishin ta wozinay ceecees.

²¹ Gidikkoka tani hayssa qoppiza wode taas sinththafe hidotay dees.

²² Hessika nuni dhayontta aggiday GODAA siiqoy daro gidida gaasonna; iza qadhetaykka mernaas wurontta gishshassa.

²³ Istti maalado maalado ooraththa; Ne ammaneteththayka daro.

²⁴ Taas qaaday GODAA; hessa gishshas ta izan xalla hidota ooththays.

²⁵ GODAY bana hidota ooththizaytassinne iza koyzaytas lo7o.

²⁶ GODAY as ashshiza ashoza izaadey co7u gi naagikko lo7o.

²⁷ Asi yelagateththa woden qambara tookkiko lo7o.

²⁸ GODAY iza toossida gishshas izi barkka co7u gi utto.

²⁹ Sinththafe izas hidotay daana dandayza gishshas bana ziqqi histti haariso.

³⁰ Baqqana koyidaades izi ba shagala besso; kawushshateththika ekko.

³¹ GODAY ase mernaaskka yeggi aggenna.

³² Izi asa bolla meto ehikkoka ba mernaa siiqon simmi qadhettees;

³³ Izi odidi asa bolla meto woykko waaye ehi erenna.

³⁴ Deraan diza qasho asay ubbay genen yedhettishin,

³⁵ Ubbaafe Dhoqqa Xoossay beyishin asas asateththa maatay digettiza wode,

³⁶ qasseka tuma pirday geellattiza wode GODAY hessa mala hanota demmennee?

³⁷ Xoossi azazontta dishin ba gidaaz polanaas dandayzay oonee?

³⁸ Iita gidiin woykko lo7o gidiin ba gidaaz polizay Ubbaafe Dhoqqa Xoossaa gidennee?

³⁹ Histtiin shemppora paxa diza asi ba nagaran qaxxayettishe aazas zuuzumizee?

⁴⁰ Hessa aggidi nuni nu oge ane pilggi xeelloos; GODAAKKOKA simmoos.

⁴¹ Ane nuni nu wozinanne nu kushe salon diza Xoossako pude denththidi,

⁴² «Nu GODAWU! Nuni makkallidos; nagarakka ooththidos; hessa gishshas neni nuna maarabeekka.

⁴³ Neni hanqon kumada nuna gooddadasa; ne nuna qadhetay baynda wodhadasa.

⁴⁴ Woosay neekko aadhdhi bontta mala nena shaaran kammadasa.

⁴⁵ Ne nuna ayzaabeta giddon orcconne buura kessadasa.

⁴⁶ Nu morkketi ubbay ba doona nu bolla doyda.

⁴⁷ Nuni bashshaninne laaleteththan metoninne shiron kumdos» goos.

⁴⁸ Ta derey wurida gishshas ta ayfeppe afunththi di7o mala goggides.

⁴⁹ Shempontta ubba wode ta ayfeppe afunththi gukkees.

⁵⁰ Hessi hananay Xoossi saloppe duge xeellana gakkanaassa.

⁵¹ Tani diza kataman diza ubbaa maccassata bolla gakkida metoza tani ta ayfen be7ida gishshas ta wozinay ceecides.

⁵² Gaasoykka baynda taas morkke gididayti kafo mala tana shankkatida.

⁵³ Istti tani shemppora paxa dishin duge ollan yeggida; shuchchika ta bolla olida.

⁵⁴ Haaththi kumidi taas hu7e bollara goggides; tani dhayadis gaada qoppadis.

⁵⁵ Ta GODAWU! Tani ciimma olla giddon dashe ne sunththa xeygadis.

⁵⁶ Ta waaso ne siyana mala ta nena woossiin siyadasa.

⁵⁷ Ta nena xeygida wode ne taakko shiiqada, «Yayyofa» gadasa.

⁵⁸ Godoo! Ne taas mootettada tana ashshadasa.

⁵⁹ GODAWU! Ne ta bolla gakkida qohoza beyadasa; ne taas pirda.

⁶⁰ Ta morkketi ta bolla halo kessanaas qoppidayssanne istti ta bolla zuppetidayssa ne beyadasa.

⁶¹ Ta GODAWU! Istti tana cayida cashshanne ta bolla maqettida maqqoza ne siyadasa.

⁶² Gallas kumeth ta morkketi ta bolla saasuketteettessinne zuuzumeettes.

⁶³ Ne istta xeella! Istti eqqidi gidiin uttidi ba yeththan tana caddeettes.

⁶⁴ Ta GODAWU! Ne isttas istta ooso mala imma.

⁶⁵ Istta wozina dammisa; Ne qanggeththi istta gakko.

⁶⁶ Abeet GODAWU! Ne istta ne hanqon goodda; salo garsafe dhayssa.