ኤርማሳ ዚላስ 2 - Geeshsha Maxaafa

Xoossi Yerusalaame Bolla Ehida Hanqo

¹ GODAY Xiyoone macca nayo ba hanqon wostti kawushshidee! Isra7eele bonchcho saloppe duge sa7an yeggides; izi ba hanqo gallas ba toho shempisizaso gididaaro zaari qoppanaas koyibeenna.

² Yaaqoobe duussaso ubbaa Xoossi qadhetay baynda dhayssides; Yuhuda dere miixata izi ba hanqon laallides; izi kawoteththanne dere ayssizayta kawushshidi duge biittan yeggides.

³ Izi ba gita hanqon Isra7eele wolqqa liiqisides; morkkey iza olanaas yiza wode ba maado kushe isttafe denththides; ba yuushon diza ubbaa miza tama laco mala iza hanqoy Yaaqoobe bolla eexxi kezides.

⁴ Izi morkke mala wondafe dafi oykkides; iza ushachcha kushey yiishshaa yeddanaas giigsides; bana lo7izayta ubbaa morkke mala shukkides; Xiyoone dunkaaneta bollaka ba hanqo tama mala qolides.

⁵ Xoossi morkke mala gididi Isra7eele dippi histtides; kawoteththa keeththaaka dhayssides; izi miixaakka laallides; Yuhuda asaa bolla kayonne zilas darssides.

⁶ Izi ba keeththa kaththa giddon diza gaabba shoddiza mala shoddi olides; Xoossi Xiyoono iza layththan layththan bonchchiza ba7aaletanne sambatata diggides; izi ba mino hanqon kawozanne qeeseza kawushshides.

⁷ GODAY yarsho yarshizasohoza kadhides; ba keeththaaka aggides; ba kawoteththa keeththa gimbeta morkkes aaththi immides; ba7aale gallassatan ooththizayssaththo istti GODAA Keeththan keehi waassida.

⁸ GODAY Xiyoone katama gimbe laallanaas qanxxi dendides; mixe wodoroza piddisides; izi istta dhayssontta aggenna; miixatinne gimbetti laalettida; isttika issife dhayda.

⁹ Izi pengeti duge biittan gelida; kare gordiza birata kolatati meqeretti wodhdhida; izi kawozinne daannati ayzaabetan di7etti bida; hayssafe guye kase isttas diza wogay ooththenna; izi nabetaska hayssafe guye GODAAPPE ajjuutay qonccenna.

¹⁰ Xiyoone dere cimati biitta bolla co7u gi uttida; istti ba hu7en gudulla laallida; maaqaka may7ida; Yerusalaame geela7oti duge biitta xeellida.

¹¹ Ta derey wurides; naateththa naytinne qeeri nayti katama giddon labbani kundida. Hessa gishshas ta ayfey afunththan baljumides; taas maracey kokkorides; ta wozinaykka seerides;

¹² Olason madunxi kundida asata mala katamay giddon istti daaburda; istti bantta aayeta, «Kaththinne haaththi nuus awan dizee?» gi oychchishe istti qese bolla borkotidi shemppo kezida.

¹³ «Hanne Yerusalaame! Ta ne gishshas ay gaanaas dandayazinaa? Ta nena aazara ginasa xeelloo? Hanne dosettida Xiyoone geela7oyee! Ta nena wostta minththeththanaas dandayazinaa? ne madunththay abbafeka cimmatees; nena paththanaas dandayzay oonee?

¹⁴ Ne nabeta ajjuutay wordonne coo hada; ne nagara qonccisidi nena di7eteththafe ashshettenna; istti nees yootiza tinbitey baleththizaazinne ogeppe kare kessizaaza.

¹⁵ Ne achchara aadhdhi biza ubbay ne bolla ba kushe baqqi kaa7ana; biitta ubbaan aadho lo7o geetettiza katamayanne dere ubbay ufayettiza katamaya hanii?» gaana; qidhishekka ba hu7e qaaththana.

¹⁶ Ne morkketi ubbay issife bantta doona keehi doyda; bantta ach saxxishe qidhida; «Nuni izo mittidos! nuni amottidaara hanno; shemppora paxa diidi gakki ayfen be7idos» gida.

¹⁷ Xoossi ba qoppidayssa ooththides; daro wodeppe kase yootida qaala polides; izi nena qadhetay baynda laallides; ne waayettishin morkkey ufayettana mala ne morkketa dhoqqu dhoqqu histtides.

¹⁸ Yerusalaame gimbe giddon diza asawu! Xoossaako waassite; intte afunththi omarsinne gallas di7o mala goggo; intteka shempofte; intte ayfesikka shemppo immofte.

¹⁹ Qammaa kumeth dendidi waassite; Godaa sinththan intte wozina haaththa mala gussite; oge doonan koshatti kundida ne nayta shemppo gishshas ne kushe pude izakko denththada woossa.

²⁰ Abeet GODAWU! Hayssa ne be7a! Neni hayssaththo kase oona bolla ooththa erizaakko ane akeeka; aaya yela dichchida naa zaara maanaas bessizee? Qeeseynne nabey Xoossa Keeththan hayqqanaas bessizee?

²¹ Yelagatinne cimati hayqqidi ogen kundi attida; yelaga maccassatinne attumati mashshan hayqqida; ne hanqettida gallas istta wodhadasa; qadhetay bayndaka shukkadasa.

²² Ba7aale gallas diggisas xeygiza mala ta morkketa ta bolla xeygadasa; ne hanqo gallas oonikka kessi ekkibeenna; woykko shemppora paxa attiday deenna; ta yela dichchidayta morkkey taappe dhayssides.